नयाँ दिल्ली: भारतीय प्रधानमन्त्री नरेन्द्र मोदी उज्बेकिस्तान र किर्गिस्तानको चारदिने भ्रमण पूरा गरी स्वदेश फर्किएका छन्। किर्गिस्तानमा उनले सांघाई सहयोग संगठन (एससीओ) शिखर सम्मेलनमा सहभागिता जनाएका थिए भने उज्बेकिस्तान भ्रमण द्विपक्षीय सम्बन्धमा केन्द्रित थियो।
भ्रमणका क्रममा उज्बेकिस्तानले प्रधानमन्त्री मोदीलाई आफ्नो सर्वोच्च राजकीय सम्मान ‘ओली दाराजाली दोस्तलिक’ प्रदान गर्‍यो। भारतमा यो सम्मानलाई लिएर ‘बाबर’को इतिहाससँग जोडेर राजनीतिक बहस भइरहे पनि उज्बेकिस्तानले यसको उद्देश्य ऐतिहासिक विवाद नभई दुई देशबीचको वर्तमान मित्रता र विश्वासको सम्मान गर्नु रहेको स्पष्ट पारेको छ।
भारतका लागि उज्बेकिस्तानका राजदूत सरदोर मिर्जायुसुपोविच रुस्तम्बेवका अनुसार विदेशी राष्ट्रका नेतालाई यो सम्मान प्रदान गर्नु अत्यन्त दुर्लभ हो। ‘दोस्तलिक’को अर्थ मित्रता हो र यसले दुई देशबीचको सम्बन्ध उच्चतम तहमा पुगेको संकेत गर्छ।
राजदूतले यो सम्मान आपसी मित्रता, विश्वास र भाइचाराको बलियो प्रतीक भएको बताउँदै भारत–उज्बेकिस्तान सम्बन्धको भविष्यका लागि यसले शक्तिशाली आधार तयार गरेको उल्लेख गरेका छन्।