गान्ताेक: सिक्किमका नवनियुक्त माननीय राज्यपाल श्री दुष्यन्त गौतमसँग आज लोकभवनमा गङ्कटोक जिल्लाका जिल्लापाल (डीसी) श्री रोहन अगवाने र वरिष्ठ पुलिस अधीक्षक (एसएसपी) डा. छिरिङ नामग्याल ग्यात्सोले शिष्टाचार भेटघाट गरेका छन्।
​बैठकका क्रममा माननीय राज्यपालले दुवै अधिकारीहरूबाट उनीहरूका सम्बन्धित विभागहरूको कार्यशैली तथा कार्यप्रगतिका विषयमा जानकारी लिए। भेटघाटको अवसरमा जिल्लापाल श्री रोहन अगवानेले राज्यपाल महोदयलाई गङ्कटोक जिल्लाका प्रशासनिक कार्यहरू, सार्वजनिक सेवा प्रवाह र विभिन्न विकास निर्माणका गतिविधिहरूबारे विस्तृत रूपमा अवगत गराए।
​गङ्कटोक क्षेत्र भौगोलिक रूपमा संवेदनशील भएकाले माननीय राज्यपालले मनसुनका समयमा आइपर्ने प्राकृतिक चुनौतीहरू र जिल्लाको विपद् व्यवस्थापन पूर्वतयारीबारे पनि जिल्लापालसँग सोधपुछ तथा छलफल गरे।
​अर्कोतर्फ, वरिष्ठ पुलिस अधीक्षक डा. छिरिङ नामग्याल ग्यात्सोले माननीय राज्यपाललाई जिल्लाको समग्र कानून-व्यवस्था, सुरक्षा स्थिति र अपराध नियन्त्रणका उपायहरूबारे जानकारी गराए। सो अवसरमा माननीय राज्यपालले समाजमा शान्ति, सुरक्षा र अमनचयन कायम राख्न जिल्ला प्रशासन तथा पुलिस बलले पुर्याएको योगदानको सराहना गरे।