​गान्धीनगर: गुजरात प्रहरीको ‘साइबर सेन्टर अफ एक्सीलेन्स’ ले भारतका २० राज्यमा फैलिएको एउटा ठूलो साइबर ठगी गिरोहको पर्दाफाश गरेको छ। ५३ करोड ५५ लाख भारु भन्दा बढी ठगीमा संलग्न रहेको आरोपमा प्रहरीले गुजरातका विभिन्न स्थानबाट १० जनालाई पक्राउ गरेको हो।
​प्रहरीका अनुसार यो गिरोहले संगठित रूपमा देशभरका सर्वसाधारणलाई ठगी गर्दै आएको थियो। पक्राउ परेकामध्ये आणन्द जिल्लाका साहिलमिया शब्बीरमिया मालिकको सम्बन्ध मुम्बईमा भएको राष्ट्रवादी कांग्रेस पार्टी (एनसीपी) का नेता तथा पूर्वमन्त्री बाबा सिद्दीकीको हत्याकाण्डसँग समेत जोडिएको खुलेको छ। मालिकले सिद्दीकी हत्याकाण्डका अभियुक्त सलमान वोहरालाई बैंक खाता उपलब्ध गराएको प्रहरीको दाबी छ।
​गान्धीनगरमा आयोजित पत्रकार सम्मेलनमा प्रहरीले दिएको जानकारी अनुसार प्राविधिक निगरानीका आधारमा ती मुख्य अभियुक्तहरूलाई पक्राउ गरिएको हो। उनीहरूले कमिसन लिएर साइबर अपराधबाट प्राप्त रकम विभिन्न बैंक खातामा व्यवस्थापन गर्ने कार्य गर्दै आएका थिए। अनुसन्धानका क्रममा देशभरबाट उनीहरूविरुद्ध १३२ वटा उजुरी परेको पाइएको छ।
​कुन राज्यमा कति उजुरी?
प्रहरीका अनुसार सबैभन्दा बढी उजुरी गुजरातमा २२ वटा रहेका छन्। त्यस्तै, कर्नाटकमा १४, महाराष्ट्रमा १३, उत्तर प्रदेशमा १० र केरलमा १० वटा उजुरी दर्ता भएका छन्। प्रहरीले अभियुक्तहरूको साथबाट ११ वटा मोबाइल फोन, ११ वटा चेकबुक र ठूलो संख्यामा पासबुक तथा डेबिट कार्ड बरामद गरेको छ।
​जफत गरिएका मोबाइलको प्रारम्भिक विश्लेषणबाट १९७ वटा बैंक खाताको विवरण प्राप्त भएको छ, जसमध्ये ६० वटा खाता प्रत्यक्ष रूपमा साइबर ठगीमा प्रयोग भएको देखिएको छ। पक्राउ पर्नेमा निजामुद्दीन दीवान, तुषार बलन्द, मोइन मलिक, कृपाल देसाई, सोहिल मालिक, जिग्नेश पटेल, वनराज भरवाड, रिकेन उर्फ रकी र आकाश पटेल रहेका छन्।