गेजिङ: पर्यटन तथा नागरिक उड्डयन मन्त्री रिरिङ टी. भोटिया को निर्देशनमा पर्यटन तथा नागरिक उड्डयन विभागको एक टोलीले गेजिङ जिल्लाको योक्सम क्षेत्रमा पर्यटन सम्भावित स्थलहरूको विस्तृत निरीक्षण गरेको छ।
सरकारको बौद्ध सर्किट योजनाअन्तर्गत विकास गर्न सकिने स्थानहरूको मूल्याङ्कन गर्नुका साथै विद्यमान पर्यटन पूर्वाधारको अवस्थाबारे समीक्षा गर्ने उद्देश्यले उक्त निरीक्षण गरिएको हो। टोलीको नेतृत्व विभागका प्रधान अभियन्ता तथा सचिव नीरज प्रधान ले गरेका थिए।
निरीक्षणका क्रममा टोलीले धार्मिक तथा ऐतिहासिक दृष्टिले महत्वपूर्ण मानिने दुब्दी गुम्पा र हुङ्ग्री गुम्पा लगायतका स्थलहरूको अवलोकन गरेको थियो। ती सम्पदा स्थलहरूको सांस्कृतिक तथा आध्यात्मिक महत्त्व संरक्षण गर्दै आगन्तुकका लागि सुविधा विस्तार र पहुँच सुधार गर्ने सम्भावनाबारे अध्ययन गरिएको जनाइएको छ।
भ्रमणका क्रममा स्थानीय सरोकारवाला तथा प्रतिनिधिहरूसँग छलफल गर्दै विकाससम्बन्धी आवश्यकताबारे जानकारी संकलन गरिएको थियो। साथै, योक्सम क्षेत्रमा निर्माणाधीन पर्यटन पूर्वाधार परियोजनाहरूको प्रगतिसमेत समीक्षा गरी समयमै सम्पन्न गर्न र गुणस्तर मापदण्ड पालना गर्न निर्देशन दिइएको बताइएको छ।