२४ घण्टाभित्रै असुल भयो ठगीको ३३ हजार रुपैयाँ

​सिलगढी: पर्यटकहरूको सुरक्षा र सहयोगका लागि सिलगढी मेट्रोपोलिटन पुलिसद्वारा हालै सुरु गरिएको २४ घण्टे टुरिस्ट हेल्पलाइन सेवा सञ्चालनको पहिलो हप्तामै प्रभावकारी देखिएको छ।
यात्राका क्रममा ठगीमा परेका दुई छुट्टाछुट्टै उजुरीमाथि पुलिसले तत्काल कारबाही अघि बढाउँदै पर्यटकको रकम फिर्ता गराउन सफलता प्राप्त गरेको छ।
​पुलिस स्रोतका अनुसार बिहार निवासी अंकित कुमार गान्तोक घुम्न जाने क्रममा पुलिस जंक्सन आइपुगेका थिए। उनले सामाजिक सञ्जालमा एउटा ट्राभल पेजमार्फत बसोबास, खाना र घुमघामको व्यवस्थासहित ३३ हजार रुपैयाँको टुरिस्ट प्याकेज बुक गरेका थिए। अनलाइन भुक्तानी गरेर उनी गान्तोक पुगे तर त्यहाँ पुग्दा न त कुनै होटल बुक गरिएको पाइयो, न त प्रतिबद्धता गरिए अनुसारको कुनै व्यवस्था नै थियो। आफू ठगिएको थाहा पाएपछि उनले तत्काल सिलगढी पुलिसको टुरिस्ट हेल्पलाइनमा सम्पर्क गरेर यसबारे उजुरी दिएका थिए।
​उजुरी प्राप्त हुनासाथ एसीपी (ट्राफिक) सुवीर दत्तको निर्देशनमा सिलगढी जंक्सन ट्राफिक गार्डका आईसी रिदम साहाले मामिलाको अनुसन्धान सुरु गरे। पुलिस टोलीले तुरुन्तै उक्त ट्राभल एजेन्सीको कार्यालयमा छापा मार्यो। मुख्य अभियुक्त फरार भए तापनि घटनामा संलग्न अर्का एक व्यक्तिलाई पुलिसले नियन्त्रणमा लिएको थियो।
प्रहरीको तीव्र सक्रियतापछि २४ घण्टाभित्रै पर्यटकको सम्पूर्ण ३३ हजार रुपैयाँ फिर्ता गराउन पुलिस सफल भयो। रकम फिर्ता भएपछि एसीपी सुवीर दत्तले आफैँ पर्यटकलाई फोन गरेर जानकारी गराएका थिए। पीडित पर्यटक अंकित कुमारले सिलगढी पुलिसको यस्तो द्रुत कारबाहीको प्रशंसा गर्दै यति चाँडै न्याय पाइने आशा नगरेको बताए।
​यसै हेल्पलाइनमा प्राप्त अर्को एउटा उजुरीमाथि कारबाही गर्दै प्रहरीले पर्यटकहरूबाट अवैध रूपमा असुल गरिएको २०० रुपैयाँ पनि फिर्ता गराएको छ। यी दुवै घटनाको सफल अवतरणसँगै सिलगढी भएर यात्रा गर्ने पर्यटकहरूका लागि यो २४ घण्टे टुरिस्ट हेल्पलाइन एउटा भरपर्दो सहयोगी संयन्त्रका रूपमा स्थापित हुन थालेको छ।