‎‎‎सोरेङ: सिक्किम सरकारी विज्ञान महाविद्यालय चाकुङको १०औँ स्थापना दिवसको अवसरमा हिङ्गुवा उत्सव कलेजको सभाहलमा भव्य रूपमा मनाइएको छ। यस वर्षको उत्सवको विषय “विकसित चाकुङ” राखिएको थियो।‎ कार्यक्रमका प्रमुख अतिथि इन्द्र हाङ सुब्बा रहेका थिए। आफ्नो सम्बोधनमा उनले मानवता, सहकार्य र समन्वयको महत्वबारे जोड दिँदै यी गुणहरूले नै मानव समाजलाई विशेष बनाउने बताए। उनले युवाहरूको वैज्ञानिक अनुसन्धान र राजनीतिमा भूमिकाबारे विस्तृत चर्चा गर्दै कानुनको शासन, स्रोतसाधनको उपयोग र विकासबीचको सम्बन्धमाथि प्रकाश पारे।‎उनले अनुसन्धान र प्रविधि मानव प्रगतिका प्रमुख आधार भएको उल्लेख गर्दै राष्ट्रिय शिक्षा नीति तथा सिक्किमको ऐतिहासिक विकासक्रमबारे पनि विचार व्यक्त गरे। साथै, राज्यलाई आत्मनिर्भर बनाउन विद्यार्थी तथा नागरिक सबैले प्रभावकारी योगदान गर्नुपर्नेमा जोड दिए। उनको सम्बोधनपछि विद्यार्थीहरूसँग अन्तरक्रियात्मक सत्र पनि सम्पन्न भयो।‎कलेजका प्राचार्य इयट्टा एम उप्रेतीले संस्थाको यात्रा, उपलब्धि र विकासबारे जानकारी गराउँदै विद्यार्थीहरूको सफलतासँगै स्थानीय समुदायसँग जोड्ने “प्राध्यापक अभ्यास” कार्यक्रमजस्ता पहलहरू प्रस्तुत गरे।‎

कार्यक्रमका क्रममा कलेजको वार्षिक पत्रिका “सिक्किम क्रोनिकल्स” सार्वजनिक गरिनुका साथै प्रमुख अतिथिद्वारा “वैज्ञानिक अनुसन्धान र राजनीतिमा युवाको भूमिका” विषयमा विशेष व्याख्यान पनि दिइयो।‎ साहित्यिक, सांस्कृतिक, भित्री तथा बाह्य खेलकुद विधाका विजेताहरूलाई ट्रफी, प्रमाणपत्र र पदक प्रदान गरी सम्मानित गरियो। ‎कार्यक्रमपछि सांसद इन्द्र हाङ सुब्बा ले कलेजका विभिन्न विभाग, प्रयोगशाला र पुस्तकालयको अवलोकन गरे।

यस अवसरमा उनले सांसद क्षेत्र विकास कार्यक्रमअन्तर्गत दुई वटा स्मार्ट पाटी, दस वटा कम्प्युटर तथा पाँच लाख रुपैयाँ बराबरको आर्थिक सहयोग प्रदान गर्ने घोषणा गरे।‎कार्यक्रममा स्थानीय पञ्चायत अध्यक्ष तथा सदस्यहरू, विभिन्न पदाधिकारी, कलेज प्रशासन, प्राध्यापक, कर्मचारी र विद्यार्थीहरूको उल्लेखनीय उपस्थिति रहेको थियो।