​मङ्गन: ‘भविष्यका लागि हरित सम्पदा’ भन्ने मूल नाराका साथ जारी ‘सिक्किम पर्यावरण पर्व २०२६’ अन्तर्गत सिक्किम सरकारको वन तथा पर्यावरण विभाग (मङ्गन प्रादेशिक डिभिजन) द्वारा आज यहाँ १० किलोमिटर लामो ‘ग्रीन म्याराथन’ प्रतियोगिता आयोजना गरिएको छ। छात्र तथा छात्रा दुवै वर्गका लागि आयोजित उक्त म्याराथन मङ्गनमा सफलतापूर्वक सम्पन्न भएको हो। डीएसी परिसरबाट सुरु भएको उक्त म्याराथनलाई मङ्गनका अतिरिक्त प्रहरी उपरीक्षक (एएसपी) विजय सुब्बा र डीएफओ मन्जिल खरेलले संयुक्तरूपमा झण्डा हल्लाएर प्रस्थान गराएका थिए। डीएसी परिसरबाट सुरु भई पुरानो पेट्रोल पम्प स्टेसन हुँदै पुनः डीएसी परिसरमै पुगेर टुङ्गिएको उक्त म्याराथनले जम्मा १० किलोमिटरको दूरी तय गरेको थियो। प्रतियोगितामा पीएम श्री मङ्गन सिनियर सेकेन्डरी स्कुल, मङ्गन गर्ल्स सिनियर सेकेन्डरी स्कुल, रिङ्घिम सिनियर सेकेन्डरी स्कुल, सिङ्घिक सेकेन्डरी स्कुल र नर्थ सिक्किम एकेडेमीका गरी करिब ९० जना विद्यार्थीहरूले उत्साहजनक रूपमा सहभागिता जनाएका थिए।
​सिक्किम पर्यावरण पर्व २०२६ अन्तर्गतको मुख्य कार्यक्रमका रूपमा आयोजित यस ग्रीन म्याराथनको उद्देश्य युवा पुस्तामा शारीरिक तन्दुरुस्तीका साथै पर्यावरण संरक्षणको महत्त्वबारे चेतना जगाउनु थियो। प्रकृति संरक्षण सामूहिक जिम्मेवारी हो भन्ने सन्देश दिँदै यस कार्यक्रमले सहभागीहरूलाई दिगो बानीहरू अपनाउन र हरित एवं स्वस्थ भविष्य निर्माणमा योगदान पुर्‍याउन प्रेरित गरेको छ। प्रतियोगिताको छात्र वर्गमा पीएम श्री मङ्गन सिनियर सेकेन्डरी स्कुलका फुर्साङ शेर्पा प्रथम, नर्थ सिक्किम एकेडेमीका अभिषेक क्षेत्री द्वितीय र सिङ्घिक सेकेन्डरी स्कुलका सुकिथाङ सुब्बा तृतीय भएका छन्। त्यसैगरी, छात्रा वर्गमा पीएम श्री मङ्गन सिनियर सेकेन्डरी स्कुलकी सोममाया सुब्बाले प्रथम स्थान हासिल गरेकी छन् भने रिङ्घिम सिनियर सेकेन्डरी स्कुलकी लेडिया शेर्पा द्वितीय र सोही विद्यालयकी रचना लिम्बू तृतीय भएका छन्।
​प्रतियोगिताको समापनपछि आयोजित पुरस्कार वितरण समारोहमा मङ्गनका एडीएम पेमा वाङ्छेन नामकार्पा, एएसपी विजय सुब्बा, एसडीएम सन्दीप कुमार, आरटीओ तेम्पो आर. भोटिया, डीएफओ मन्जिल खरेल, डेपुटी आरटीओ जिग्मी भोटिया, एसीएफ नरेन्द्र सापकोटा लगायत वन तथा पर्यावरण विभागका अधिकारीहरूले विजेता तथा सहभागीहरूलाई ट्रफी र प्रमाणपत्र वितरण गरेका थिए। म्याराथनलाई सुरक्षित र व्यवस्थित रूपमा सम्पन्न गर्न जिल्ला अस्पताल मङ्गनको मेडिकल टोली, मङ्गन प्रहरी विभाग र नर्दन राइडर मोटरसाइकल क्लबले प्राविधिक तथा व्यवस्थापकीय सहयोग पुर्‍याएका थिए। वन तथा पर्यावरण विभागले आगामी पुस्ताका लागि दिगो हरित सम्पदा छोड्ने उद्देश्यका साथ मङ्गन जिल्लाभरि आयोजना गरिरहेका विभिन्न चेतनामूलक कार्यक्रमहरूको शृङ्खलाअन्तर्गत नै यो म्याराथन आयोजना गरिएको हो।