‎गान्तोक: मुख्यमन्त्री प्रेमसिंह तामाङ (गोले) ले सिक्किमको ५१औँ राज्य दिवसका अवसरमा प्रधानमन्त्री नरेन्द्र मोदीले पठाएको शुभकामना सन्देशप्रति सम्पूर्ण सिक्किमवासीको तर्फबाट हार्दिक आभार व्यक्त गरेका छन्।
‎मुख्यमन्त्री तामाङले प्रधानमन्त्रीले आफ्नो सन्देशमार्फत सिक्किमको प्राकृतिक सौन्दर्य, समृद्ध सांस्कृतिक विरासत, दिगो विकासप्रतिको प्रतिबद्धता तथा सद्भावनाको भावनाको प्रशंसा गरेको उल्लेख गर्दै उक्त शब्दहरू प्रत्येक सिक्किमेलीका लागि अत्यन्त सम्मान र गर्वको विषय बनेको बताएका छन्।
‎उनले प्रधानमन्त्रीको मार्गदर्शन, स्नेह तथा सिक्किमप्रतिको निरन्तर सहयोगले राज्यलाई शान्ति, प्रगति र समृद्धिको मार्गमा अघि बढ्न प्रेरणा दिइरहेको उल्लेख गरे।
‎मुख्यमन्त्रीले प्रधानमन्त्रीका शुभकामना, आशीर्वाद तथा राज्यको विकास र जनकल्याणप्रतिको निरन्तर प्रतिबद्धता सधैँ सिक्किमवासीको हृदयमा रहने विश्वास व्यक्त गर्दै पुनः धन्यवाद ज्ञापन गरेका छन्।