खरसाङ: दार्जीलिङ वेलफेयर सोसाइटीले राज्यसभा सांसद तथा संस्थाका अध्यक्ष हर्षवर्द्धन श्रृङ्गलाको मार्गदर्शनमा, क्याप्टेन ब्रिजेश थापा, एक वीर सैनिक तथा साहस, दृढ संकल्प र सच्चा देशभक्तिको भावनाका साथ कर्तव्य निर्वाह गर्ने एक अनुकरणीय अधिकारीको स्मृति र बलिदानलाई सम्मान गर्दै दार्जीलिङ पहाडका विभिन्न क्षेत्रमा उत्कृष्ट उपलब्धि हासिल गरेका व्यक्तित्वहरूलाई सम्मान गर्ने उद्देश्यले ‘क्याप्टेन ब्रिजेश थापा डीडब्ल्युएस उत्कृष्ट उपलब्धि पुरस्कार २०२६ को लागि आवेदन आह्वान गरेको छ। २७ वर्षको उमेरमा जम्मू–कश्मीरमा आतंकवादविरोधी अभियानका क्रममा उनले वीरगति प्राप्त गरेका थिए। क्याप्टेन थापाको जीवन निःस्वार्थ सेवा तथा दार्जीलिङ पहाड र गोर्खा समुदायको प्रगतिप्रतिको अटल प्रतिबद्धताको उदाहरण हो भन्ने कुरा संस्थाले जनाएको छ। वार्षिक रूपमा प्रदान गरिने यस पुरस्कारले उत्कृष्टता, समर्पण र समाजमा सार्थक प्रभाव सिर्जना गर्ने व्यक्तित्वहरूलाई सम्मान गर्दै दार्जीलिङ पहाड र गोर्खा समुदायको गौरव बढाउने लक्ष्य राखेको बताइएको छ। संस्थाले जानकारी गराए अनुसार यस पुरस्कारका विजेताले एक लाख रुपैयाँ नगद पुरस्कार, डीडब्ल्युएस पदक र सम्मानपत्र प्राप्त गर्नेछन्। आवेदन ११ अगस्त २०२६ देखि शुरु भएर २६ अगस्त २०२६ मा बन्द हुनेछ। इच्छुक व्यक्ति वा संस्थाहरूले दार्जीलिङ वेलफेयर सोसाइटीको आधिकारिक वेबसाइट www.darjeelingwelfaresociety.com मा उपलब्ध गराइएको गुगल फाराममार्फत आवेदन पेश गर्नुपर्नेछ भने उम्मेदवारको उमेर सामान्यतया १८ देखि ४० वर्ष बीचको हुनुपर्नेछ। तथापि, जुरी वा दार्जीलिङ वेलफेयर सोसाइटीका अध्यक्षको सिफारिसमा उमेरसम्बन्धी मापदण्डमा विशेष छुट दिन सकिनेछ। उम्मेदवार दार्जीलिङ पहाडको स्थायी बासिन्दा हुनुपर्नेछ। हाल भारतका अन्य भाग वा विदेशमा बसोबास गरिरहेका व्यक्तिहरूले पनि आफ्नो स्थायी बसोबास दार्जीलिङ पहाडमा रहेको प्रमाण पेश गरेमा पुरस्कारका लागि विचार गरिन सक्नेछन्। यस पुरस्कारअन्तर्गत शिक्षा, प्रतिस्पर्धात्मक परीक्षा, खेलकुद, संस्कृति तथा कला, वातावरण, सामाजिक कार्य तथा मानवीय सेवा, उद्यमशीलता, नवप्रवर्तन लगायतका विभिन्न क्षेत्रमा हासिल गरिएका उल्लेखनीय उपलब्धिहरूलाई समेटिनेछ। पुरस्कारका मापदण्ड तथा अन्य विस्तृत जानकारी दार्जीलिङ वेलफेयर सोसाइटीको वेबसाइटमा उपलब्ध गराइने ब्रोसरमार्फत सार्वजनिक गरिनेछ।