‘सदनमा चुप नबस्नू, सरकारको हर आरोपको कडा प्रतिवाद गर्नू’
​
कोलकाता: तृणमूल कांग्रेस (टीएमसी) अध्यक्ष ममता बनर्जीले आफ्ना समर्थक विधायकहरूलाई पश्चिम बंगाल विधानसभाभित्र मुख्यमन्त्री शुभेन्दु अधिकारीका हरेक राजनीतिक हमलाको तथ्य र तर्कसहित सशक्त जबाफ दिन निर्देशन दिएकी छन्।
​बिहीबार साँझ कालीघाटस्थित आफ्नै निवासमा बसेको रणनीतिक बैठकमा अध्यक्ष बनर्जीले संख्याबल कम भए पनि विपक्षको भूमिका कमजोर हुन नहुने र सदनमा सरकारका हरेक आरोपको प्रभावकारी प्रतिवाद गरिनुपर्ने स्पष्ट सन्देश दिएकी हुन्।
​बैठकको मुख्य एजेण्डा पार्टीको आगामी सङ्गठनात्मक रणनीति र विधानसभाभित्र विपक्षको भूमिका भए पनि चर्चाको ठूलो हिस्सा मुख्यमन्त्री शुभेन्दु अधिकारीद्वारा विधानसभामा गरिएका आक्रामक राजनीतिक हमलामा केन्द्रित थियो। बुधबार सदनमा मुख्यमन्त्री अधिकारीले आफू र पार्टीका राष्ट्रिय महासचिव अभिषेक बनर्जीमाथि गरेको टिप्पणीको विरोधमा तृणमूलका विधायकहरूले अपेक्षाकृत आक्रामकता देखाउन नसकेको भन्दै ममताले असन्तुष्टि व्यक्त गरेकी थिइन्।
​बैठकमा बनर्जीले भनिन्, “विपक्षको जिम्मेवारी केवल विरोधमा मात्र सीमित छैन, तथ्य, दस्तावेज र जनजीविकाका मुद्दाका आधारमा सरकारलाई घेर्नु पनि उत्तिकै आवश्यक छ।” उनले सबै विधायकहरूलाई सदनको कारबाहीका लागि राम्रो तयारी गर्न, सरकारका अभिव्यक्तिहरूको तत्काल र प्रभावकारी जबाफ दिन तथा जनतासँग जोडिएका मुद्दाहरूलाई अझ मजबुतका साथ उठाउन आह्वान गरिन्।
​आगामी दिनमा विधानसभाभित्र विपक्षको रणनीतिलाई अझ धारिलो बनाउन यस्ता बैठकहरूलाई निरन्तरता दिइने बताइएको छ। उक्त बैठकमा शोभनदेव चट्टोपाध्याय, अलिफा अहमद, कुणाल घोष, अब्दुल रहिम बक्सी, पुलक राय र मोशारफ हुसेनलगायतका वरिष्ठ नेता तथा विधायकहरूको उपस्थिति रहेको थियो।