नाम्ची: सिक्किमको नाम्ची जिल्ला तहको लागुऔषध समन्वय तथा प्रवर्तन समिति (एनकोर्ड) को बैठक आज जिल्लापाल कार्यालयको सभाहलमा सम्पन्न भएको छ।​जिल्लापाल अनूपा ताम्लिङको अध्यक्षतामा बसेको बैठकले यसअघि तय गरिएका कार्ययोजनाको प्रगति, लागुऔषध दुरुपयोग रोकथाम, कानुन कार्यान्वयन, जनचेतना र पुनर्स्थापनाका क्षेत्रमा भएका गतिविधिको विस्तृत समीक्षा गरेको छ।​बैठकलाई सम्बोधन गर्दै जिल्लापाल ताम्लिङले बालबालिका तथा युवा वर्गलाई लागुऔषधको कुलतबाट जोगाउन अभिभावक, विद्यालय र समुदायको सहकार्य अनिवार्य रहेको बताइन्। “बालबालिका र किशोर-किशोरीहरू साथीभाइको लहलहैमा लागेर लागुऔषधको जोखिममा पर्न सक्छन्,” उनले भनिन्, “उनीहरूका लागि सुरक्षित र सकारात्मक वातावरण बनाउन प्रारम्भिक चेतना र समयमै सही मार्गदर्शन आवश्यक छ।”​बैठकमा जिल्लाभित्रका संवेदनशील क्षेत्र, लागुऔषध कारोबारका सम्भावित केन्द्र र पछिल्ला नयाँ प्रवृत्तिबारे छलफल गर्दै अवैध गाँजा खेती रोक्न स्थलगत अनुगमन तीव्र बनाउने निर्णय गरिएको छ। यसका साथै प्रहरी, विशेष शाखा, लागुऔषध नियन्त्रण ब्युरो (एनसीबी) लगायतका निकायबिच सूचना आदानप्रदान र समन्वयलाई थप सुदृढ बनाउन निर्देशन दिइएको छ।​त्यस्तै, स्वास्थ्य तथा परिवार कल्याण विभागलाई लागुऔषधमुक्ति तथा पुनर्स्थापना केन्द्रहरूको नियमित अनुगमन गर्न, परामर्श तथा उपचार सेवालाई प्रभावकारी बनाउन र बरामद गरिएका लागुऔषधलाई कानुनी प्रक्रिया पुर्‍याएर यथाशीघ्र नष्ट गर्न बैठकले निर्देशन दिएको छ।