गान्ताेक: ​सिक्किमका मुख्यमन्त्री प्रेम सिंह तामाङले आफ्नो आधिकारिक सरकारी निवास ‘मिन्तोकगाङ’ मा आवतजावत प्रणाली (रोटेसनल बेसिस) मा कार्यरत समर्पित सफाइ कर्मचारीहरू दीपक रावत र प्रियंका मोथेसँग भेटघाट गर्नुभएको छ। मुख्यमन्त्रीले आफ्नो आधिकारिक सामाजिक सञ्जाल फेसबुकमार्फत यस भेटघाटको जानकारी दिँदै ती कर्मचारीहरूको अथक मिहिनेत र निष्ठाको उच्च प्रशंसा गर्नुभएको हो। समाज र सरकारी आवासलाई सफा, व्यवस्थित र स्वागतयोग्य बनाउन उनीहरूले पुर्‍याएको योगदान पर्दापछाडि रहे पनि त्यसको प्रभाव निकै अर्थपूर्ण र उदाहरणीय रहेको उहाँले उल्लेख गर्नुभएको छ।
​मुख्यमन्त्रीले आफ्ना वरपरका क्षेत्रको सौन्दर्य र गरिमा कायम राख्न अहोरात्र खटिने यी कर्मचारीहरूको निष्कपट सेवा र जिम्मेवारीवोधप्रति हार्दिक आभार प्रकट गर्नुभएको छ। प्रचारप्रसारभन्दा टाढा रहेर पनि आफ्नो दायित्वलाई पूर्ण इमानदारिताका साथ निभाउने यस्ता समर्पित कामदारहरूको अथक प्रयासले नै समाजलाई सुन्दर बनाउन मद्दत पुग्ने भन्दै मुख्यमन्त्रीले उनीहरूको उज्ज्वल भविष्य र निरन्तर समर्पणको कामना समेत गर्नुभएको छ।