​काेलकाता: पश्चिम बंगाल विधानसभा चुनाव २०२६ को पहिलो चरणको मतदान अगाडि मुख्यमन्त्री ममता बनर्जीले विपक्षीहरूमाथि कडा हमला बोलेकी छिन्। मंगलबार ब्यारकपुरको टिटागढ र जगदलमा आयोजित चुनावी जनसभालाई सम्बोधन गर्दै उनले नेताजी सुभाष चन्द्र बोसको ऐतिहासिक नारा ‘दिल्ली चलो’ गुञ्जाइन्। उनले भनिन्, “भाजपाको लक्ष्य बंगाल हो, तर तृणमूलको अबको लक्ष्य दिल्लीको सत्ता कब्जा गर्नु हो।”
​’दुआरे स्वास्थ्य’ र डीए को घोषणा
मुख्यमन्त्रीले सोही मञ्चबाट ‘दुआरे स्वास्थ्य’ (घरदैलोमा स्वास्थ्य सेवा) योजनाको घोषणा गरिन्। यसका साथै सरकारी कर्मचारीहरूको डीए (महँगी भत्ता) सम्बन्धी मागलाई सम्बोधन गर्दै उनले ठूलो आश्वासन समेत दिएकी छिन्।
​श्रमिक र ‘गद्दार’ हरूमाथि निशाना
टिटागढको जुट मिल क्षेत्रमा बोल्दै ममताले केही ‘गद्दार’ नेताहरूका कारण मजदुरहरूले दुःख पाएको बताइन्। उनले मालिकहरूसँग पैसा लिएर मिलहरू बन्द गराउने नेताहरूलाई जनताले चिनिसकेको उल्लेख गरिन्। साथै, पुलिस प्रशासनले भाजपाको इसारामा तृणमूलका सभाहरूलाई अनुमति दिन आनाकानी गरेकोमा उनले आक्रोश व्यक्त गरिन्।
​प्रधानमन्त्री मोदी र शुभेन्दुमाथि प्रहार
प्रधानमन्त्री मोदीको झारग्राम भ्रमणलाई कटाक्ष गर्दै उनले भनिन्, “क्यामेरा अगाडि बसेर १० रुपैयाँको झालमुढी खानु एउटा ढोँग मात्र हो।” उनले नंदीग्रामको प्रसङ्ग निकाल्दै शुभेन्दु अधिकारीमाथि ‘भोट लुट्ने’ षड्यन्त्र गरेको आरोप लगाइन्। ब्यारकपुरका जनतालाई अपील गर्दै उनले भनिन्, “कल्याणी एक्सप्रेसवे जस्ता विकासका कामहरू हेरेर तृणमूललाई मतदान गर्नुहोस्।”