​गान्ताेक: भारतको प्रसिद्ध हार्ड रक तथा हेभी मेटल ब्यान्ड ‘गिरिश एन्ड द क्रोनिकल्स’ (जीएटीसी) इबेरियन प्रायद्वीप (पोर्चुगल र स्पेन) मा आफ्नो सांगीतिक प्रस्तुति दिन पूर्ण रूपमा तयार भएको छ।
​युरोपको पछिल्लो सांगीतिक यात्राको करिब एक वर्षपछि ब्यान्ड पुनः युरोप फर्कन लागेको हो। यसक्रममा अगस्ट २१ देखि २३ सम्म आयोजना हुने प्रतिष्ठित ‘१७औँ मि लाग्रे मेटा लेइरो ओपन एयर फेस्टिभल’ मार्फत ब्यान्डले पोर्चुगलमा पहिलोपल्ट डेब्यु गर्दै छ। उक्त फेस्टिभलमा प्याराडाइज लस्ट, द हन्टेड, एनफोर्सर, क्रेमेटोरी, प्रिमल फिअर र आइरन मेडनका पूर्व भोकलिस्ट बलेज बेलीजस्ता विश्वविख्यात मेटल ब्यान्ड तथा गायकहरूको सहभागिता रहनेछ।
​पोर्चुगलको सांगीतिक कार्यक्रमपश्चात् जीएटीसीले अगस्ट २९ मा स्पेनको बर्गोसमा आयोजना हुने ‘भाल्डोर रक फेस्टिभल’मा मुख्य प्रस्तुति (हेडलाइनर) दिनेछ। सन् २०२२ देखि नै बर्गोसका दर्शकमाझ निकै लोकप्रिय बनेको यस ब्यान्डको यो वर्षको दोस्रो अन्तर्राष्ट्रिय भ्रमण हो।
​यसअघि मार्च २०२६ मा अस्ट्रेलियाको सफल सांगीतिक यात्रा पूरा गरिसकेको ब्यान्ड अहिले आफ्नो चौथो स्टुडियो एल्बमको तयारीमा जुटिरहेको छ, जसको भर्खरै सार्वजनिक गरिएको ‘जेनेरेसन कावर्ड’ सिङ्गल गीतले राम्रो चर्चा पाइरहेको छ।