गान्ताेक: सिक्किमका राज्यपाल ओमप्रकाश माथुरले राष्ट्रिय राजमार्ग-१० को २० माइल क्षेत्रमा गएको भीषण पहिरोको स्थलगत निरीक्षण गरेका छन्। बार्दाङस्थित ‘प्रेरणा स्थल’बाट ग्याङटोक फर्किने क्रममा राज्यपाल माथुरले सडकको अवस्थाबारे जानकारी लिएका हुन्।
​निरन्तरको मनसुनी वर्षाका कारण पहाडबाट ठुला-ठुला ढुङ्गा र लेदो खस्दा सिक्किमलाई जोड्ने यो मुख्य राजमार्ग पूर्ण रूपमा अवरुद्ध भएको छ। सडक ठप्प भएपछि सवारी साधनको आवतजावत ठप्प बनेको छ।

​निरीक्षणका क्रममा राष्ट्रिय राजमार्ग तथा पूर्वाधार विकास निगम लिमिटेड (एनएचआईडीसीएल) का अधिकारीहरूले राज्यपाल माथुरलाई पहिरोको वर्तमान स्थिति र पन्छाउने क्रममा देखिएका चुनौतीहरूबारे विस्तृत जानकारी गराएका थिए। अधिकारीहरूका अनुसार राजमार्गलाई यथाशीघ्र सञ्चालनमा ल्याउन ठुलो परिमाणमा मेसिनरी र जनशक्ति परिचालन गरी पन्छाउने काम भइरहेको छ।
​सिक्किमको ‘लाइफलाइन’का रूपमा रहेको यो राजमार्गलाई सुरक्षित रूपमा खुलाउन निर्देशन दिँदै राज्यपाल माथुरले यात्रुहरूको सुरक्षालाई पहिलो प्राथमिकतामा राखेर द्रुत गतिमा काम गर्न सम्बन्धित निकायलाई ताकेता गरेका छन्।