खरसाङ: तीनधारेको बीस माइलमा अवस्थित उत्तरकेसी सिंहदेवी मन्दिरमा चलिरहेको नौ दिवसीय श्री नव दुर्गा भवानी दुर्गा पूजालाई खरसाङ खण्डको शरद स्वास्थ्य सुरक्षा सम्मान २०२६ मा प्रथम पुरस्कार प्रदान गरिएको छ। गत १२ अक्टोबर षष्टीको दिन मूर्ति स्थापना गरेर शुरु गरिएको दुर्गा पूजा आगामी २० अक्टोबर दशमीको दिनसम्म नौ दिवसीय रुपमा आयोजना हुने भएको छ। यस पूजामा मुख्य पूजारीको रुपमा कीर्तन शर्मा रहेका छन्। यस दुर्गा पूजा वार्षिक रूपमा आयोजना गर्ने गरिएको छ भने यस पूजामा दार्जिलिङ जिल्ला पुलिसको निर्देशनमा विभिन्न सचेतना विषयमा पोष्टरहरु पनि प्रदर्शन गरिएको छ‌। खरसाङ खण्डभरि चल्ने दुर्गा पूजाहरुमध्ये तीनधारेको बीस माइलस्थित श्री नवदुर्गा भवानी दुर्गा पूजा समारोह समितिलाई शरद स्वास्थ्य सुरक्षा सम्मान २०२६ मा प्रथम पुरस्कार प्रदान गरिएको जानकारी प्राप्त भएको छ। यस पूजा विषयमा आयोजक समितिका सदस्य दिपराज माझीले विस्तृत रुपमा जानकारी गराएका छन्।