गान्तोक: सिटिजन एक्सन पार्टी (काय्प) सिक्किमले जोरथाङमा बी. आर. अंबेडकरको १३५औँ जयन्ती मनाएको छ। पार्टीको अनुसूचित जाति कल्याण परिषदले जूम सालघारी एसीईसीसँगको सहकार्यमा आयोजना गरेको कार्यक्रममा अध्यक्ष गणेश कुमार राई प्रमुख अतिथि थिए।
समारोहलाई सम्बोधन गर्दै राईले अम्बेडकरको जीवन र विचारबारे चर्चा गर्दै उनका संघर्ष केवल छुवाछुतजस्ता सामाजिक कुप्रथाविरुद्ध मात्र नभई गहिरो रूपमा जरा गाडेको संरचनागत असमानताविरुद्ध रहेको बताए। उनले अम्बेडकरको बौद्धिक विरासत स्वतन्त्रता, समानता र भ्रातृत्वका सिद्धान्तमा आधारित रहेको उल्लेख गरे।
राईका अनुसार अम्बेडकरले राजनीतिक लोकतन्त्रसँगै सामाजिक र आर्थिक लोकतन्त्रको आवश्यकता औँल्याएका थिए। “यीमध्ये पछिल्ला दुई बिना राजनीतिक लोकतन्त्र अपूर्ण रहन्छ,” उनले भने।
सम्बोधनका क्रममा उनले ‘राजनीतिक छुवाछुत’ को अवधारणा प्रस्तुत गर्दै राजनीतिक प्रणालीभित्रका बहिष्करण प्रवृत्तिले आवाजहरूलाई कसरी सीमान्तकृत गर्छन् भन्नेबारे चिन्ता व्यक्त गरे। उनले सीएपी सिक्किमले समावेशीता, पारदर्शिता र समान अवसरमार्फत यस्ता प्रवृत्तिलाई चुनौती दिने प्रयास गरिरहेको दाबी गरे।
कार्यक्रममा उनले सदस्यहरू र नागरिकलाई प्रतीकात्मक स्मरणभन्दा अघि बढेर संवैधानिक नैतिकता विकास गर्न, आलोचनात्मक सोचलाई प्रोत्साहन गर्न र अन्यायविरुद्ध दृढतापूर्वक उभिन आग्रह गरे। उनका अनुसार अम्बेडकरको जीवन समकालीन नेतृत्वका लागि नैतिक मार्गदर्शकका रूपमा आह्वान गर्दछ।