​नाम्ची: पूर्वी सिक्किमस्थित एनएचपीसी टिस्टा स्टेझ-६ जलविद्युत् आयोजनाको सुरुङभित्र थुनिएका श्रमिकहरूको रातभर खोजी तथा उद्धार कार्य जारी राखिएको छ। उद्धार टोलीले थप शवहरू निकालेसँगै दुर्घटनामा ज्यान गुमाउनेको संख्या २२ पुगेको छ।
​बुधबार राति १० बजेतिर पश्चिम बंगालको असानसोलबाट इस्टर्न कोलफिल्ड्स लिमिटेड (ईसीएल) को दोस्रो विशेषज्ञ उद्धार टोली घटनास्थल पुगेर उद्धारमा जुटेको थियो। प्राविधिक जटिलता र प्रतिकूल परिस्थितिका बाबजुद विभिन्न निकायका उद्धारकर्मीहरूले मध्यरातिसम्म निरन्तर खोजी कार्य जारी राखेका थिए।
​नाम्ची जिल्ला सूचना अधिकारी (डीआईओ) का अनुसार अहिलेसम्म २२ जनाको शव सुरुङबाट बाहिर निकालिएको छ। बाँकी बेपत्ता श्रमिकहरूको खोजीका लागि विशेष टोलीहरूबीच समन्वय गरी उद्धार कार्यलाई तीव्र पारिएको छ।
​घटनापछि राज्य सरकार, जिल्ला प्रशासन तथा सम्बन्धित निकायहरूले उद्धार कार्यको प्रत्यक्ष अनुगमन गरिरहेका छन्। प्रभावित परिवारलाई राहत तथा उद्धार टोलीलाई आवश्यक सहयोग उपलब्ध गराउन सरकारी संयन्त्र परिचालन गरिएको जनाइएको छ।