गान्तोक: भारतीय जनजातीय सहकारी विपणन विकास महासङ्घ लिमिटेड (ट्राइफेड) को पहलमा असमको गुवाहाटीमा आयोजित ‘आदि महोत्सव २०२६’ मा सिक्किमका साम्दोङ कम्बल वन धन विकास केन्द्र (भिडिभिके) र छुबा पर्बिङ वन धन विकास केन्द्रले राज्यको प्रतिनिधित्व गरेका छन्।
१५ देखि २२ नोभेम्बर २०२६ सम्म सञ्चालन हुने यस राष्ट्रिय महोत्सवमा दुवै टोलीले सिक्किमका स्थानीय हस्तकला, परम्परागत सीप तथा वनमा आधारित मूल्य अभिवृद्धि गरिएका विविध उत्पादनहरूको प्रदर्शनी गरिरहेका छन्।
यस महोत्सवले सिक्किमका स्थानीय जनजातीय उद्यमी तथा वन धनका लाभार्थीहरूलाई आफ्ना मौलिक उत्पादनहरूको प्रवर्द्धन गर्न, व्यापक राष्ट्रिय बजारसँग जोडिन, परम्परागत ज्ञान तथा सीपको संरक्षण गर्न र सामूहिक उद्यममार्फत दिगो जीविकोपार्जनका अवसरहरू सुदृढ बनाउन एक महत्त्वपूर्ण मञ्च प्रदान गरेको छ।





