​गान्ताेक: सिक्किमका माननीय राज्यपाल ओम प्रकाश माथुरले गुरू रिन्पोछे थ्रुङ्कर छेचुका पावन अवसरमा सम्पूर्ण सिक्किमबासी तथा बौद्ध धर्मावलम्बीहरूमा हार्दिक शुभकामना व्यक्त गरेका छन्।
​राजभवन (लोकभवन) बाट जारी शुभकामना सन्देशमा राज्यपाल माथुरले महान आध्यात्मिक गुरू पद्मसम्भव (गुरू रिन्पोछे) को जन्मोत्सवको रूपमा मनाइने यो दिन सिक्किमका लागि विशेष आस्थाको प्रतीक रहेको उल्लेख गरेका छन्।
​आफ्नो सन्देशमा उनले भनेका छन्, “आठौँ शताब्दीमा गुरू रिन्पोछेले हाम्रो पवित्र भूमि ‘बयुल द्रेमोजोङ’ (चामलको लुकेको उपत्यका) मा पाइला टेकेर पावन बनाउनुभएको थियो र हिमाली क्षेत्रमा बौद्ध धर्मको प्रचारप्रसार गर्नुभएको थियो। उहाँलाई हामी सिक्किमबासी आफ्ना संरक्षक सन्तका रूपमा श्रद्धाका साथ पूज्छौँ।”
​गुरू रिन्पोछेका उपदेशहरूले मानिसलाई शान्ति, करुणा, आपसी भाइचारा र नैतिक मूल्यको बाटो देखाउने उल्लेख गर्दै राज्यपालले सिक्किम ‘विविधतामा एकता’ को जीवन्त उदाहरण भएको बताए। यहाँ सबै सम्प्रदाय र धर्मका मानिसहरूले एकअर्काको संस्कृतिको सम्मान गर्दै हातेमालो गरिरहेको उनले उल्लेख गरे।
​यस पावन अवसरमा गुरू रिन्पोछेले देखाउनुभएको करुणा र सद्भावको मार्गमा हिँड्ने सङ्कल्प लिन आग्रह गर्दै राज्यपालले राज्यमा सुख, शान्ति, समृद्धि र सामूहिक प्रगति रहोस् भनी प्रार्थना गरेका छन्।