गान्ताेक: गुरू रिन्पोछेको पावन एवं शुभ जन्मोत्सव ‘थ्रुङ्कर छेचु’का अवसरमा सिक्किमका मुख्यमन्त्री प्रेम सिंह तामाङले सम्पूर्ण सिक्किमबासीमा हार्दिक शुभकामना व्यक्त गरेका छन्।
​मुख्यमन्त्रीद्वारा जारी शुभकामना सन्देशमा सिक्किमका संरक्षक सन्त गुरू रिन्पोछेको ज्ञान, करुणा र चेतनासम्बन्धी गहिरो उपदेशले राज्यमा अमिट आध्यात्मिक विरासत छोडेको उल्लेख गरिएको छ। पवित्र भूमि सिक्किममा गुरू रिन्पोछेको ऐतिहासिक योगदानले मानिसहरूमा आस्था र विश्वास बढाउनुका साथै सांस्कृतिक धरोहरलाई मजबुत बनाउँदै भावी पुस्तालाई शान्ति र धर्मको मार्गमा हिँड्न प्रेरणा दिइरहेको बताइएको छ।
​”यस पावन अवसरमा हामी गुरू रिन्पोछेप्रति हार्दिक श्रद्धासुमन अर्पण गर्दछौँ र हाम्रो प्रिय सिक्किम तथा यहाँका जनतामा उहाँको निरन्तर आशीर्वाद रहोस् भनी प्रार्थना गर्दछौँ,” मुख्यमन्त्रीको सन्देशमा भनिएको छ।
​मुख्यमन्त्रीले यो पवित्र पर्वले प्रत्येक घरमा शान्ति, सुख, राम्रो स्वास्थ्य र समृद्धि ल्याओस् तथा सम्पूर्ण प्राणीहरूको कल्याणका लागि भाइचारा, करुणा र सद्भाव कायम रहोस् भन्ने कामनासमेत गरेका छन्।