छनोट भएका बिरामीको सिलिगुडीमा शल्यक्रिया गरिने
गान्तोक: महिला, बाल, ज्येष्ठ नागरिक तथा दिव्याङ्गजन कल्याण विभाग (डब्ल्यूसीएससी एन्ड डीडब्ल्यूडी), गान्तोक जिल्लाको आयोजनामा ‘अटल वयो अभ्युदय योजना (एभीवाईएवाई) २०२६’ अन्तर्गत ज्येष्ठ नागरिकहरूका लागि निःशुल्क मोतीबिन्दु (क्याटर्याक्ट) जाँच शिविर सफलतापूर्वक सम्पन्न भएको छ। सिक्किम सरकारको स्वास्थ्य एवं परिवार कल्याण विभाग तथा सिलिगुडीस्थित ग्रेटर लायन्स आँखा अस्पतालको समन्वयमा उक्त शिविर सञ्चालन गरिएको हो।
अभियानको पहिलो चरणअन्तर्गत गत १६ नोभेम्बर २०२६ का दिन गान्तोक नगर निगम (जीएमसी) भवनमा आयोजित शिविरमा गान्तोक जिल्लाका विभिन्न भेगबाट आएका ज्येष्ठ नागरिकहरूको उत्साहजनक सहभागिता रहेको थियो। गान्तोक नगर निगमका उप-प्रमुख (डेपुटी मेयर) को विशेष उपस्थितिमा सम्पन्न उक्त कार्यक्रममा विभिन्न सरकारी अधिकारी तथा सहभागी संस्थाका प्रतिनिधिहरूको सहभागिता रहेको थियो।
विशेषगरी मोतीबिन्दुका कारण दृष्टिदोषको समस्या झेलिरहेका ज्येष्ठ नागरिकहरूलाई सहज रूपमा आँखा उपचार सेवा उपलब्ध गराउने उद्देश्यले शिविर आयोजना गरिएको हो। शिविरमा दक्ष चिकित्सक तथा स्वास्थ्यकर्मीहरूको टोलीले ज्येष्ठ नागरिकहरूको आँखा परीक्षण गर्नुका साथै थप उपचार तथा शल्यक्रियाका लागि उनीहरूको शारीरिक अवस्था र आवश्यक स्वास्थ्य मापदण्डहरूको समेत जाँच गरेका थिए।
यसै पहललाई निरन्तरता दिँदै १७ नोभेम्बर २०२६ का दिन खाम्दोङ खण्ड प्रशासनिक केन्द्र (बीएसी) मा पनि यस्तै निःशुल्क जाँच शिविर सञ्चालन गरियो। समाजसेवी तथा माननीय मन्त्री श्री एन.बी. दाहालकी धर्मपत्नी सुश्री सबिना राई दाहालको आतिथ्यमा सम्पन्न उक्त शिविरमा वार्ड पञ्चायत तथा स्थानीय प्रतिनिधिहरूको उपस्थिति रहेको थियो। खाम्दोङ र आसपासका क्षेत्रका ज्येष्ठ नागरिकहरूको उल्लेखनीय सहभागिता रहेको उक्त शिविरमा समेत चिकित्सकहरूले आँखा र आधारभूत स्वास्थ्य परीक्षण गरेका थिए।

दुवै स्थानमा गरिएको स्वास्थ्य परीक्षण र मूल्याङ्कनका आधारमा शल्यक्रियाका लागि योग्य ठहरिएका बिरामीहरूको सूची तयार पारी उनीहरूलाई विशेषज्ञ आँखा उपचार तथा निःशुल्क मोतीबिन्दु शल्यक्रियाका लागि सिलिगुडीस्थित ग्रेटर लायन्स आँखा अस्पताल पठाउने व्यवस्था मिलाइने विभागले जनाएको छ।
गान्तोक जिल्लाकी समाज कल्याण अधिकारी सुश्री मणिकला गुरुङ तथा समाज कल्याण निरीक्षक (एसडब्ल्यूआई) हरूको समर्पित टोलीको सक्रिय समन्वय र व्यवस्थापनमा दुवै शिविर सुव्यवस्थित रूपमा सम्पन्न भएका थिए। ज्येष्ठ नागरिकहरूको स्वस्थ बुढ्यौली, सम्मानजनक जीवनयापन र गुणस्तरीय स्वास्थ्य सेवामा पहुँच सुनिश्चित गर्न विभाग प्रतिबद्ध रहेको जनाउँदै अटल वयो अभ्युदय योजनामार्फत यस्ता जनमुखी कार्यक्रमहरूलाई निरन्तरता दिइने विभागले स्पष्ट पारेको छ।





