​गान्ताेक: दादी प्रकाशमणिजीको स्वर्गारोहण दिवस तथा विश्व भ्रातृत्व दिवसको अवसरमा आगामी २५ अगस्टका दिन ग्याङटोकस्थित ठाकुरबारीमा वृहत् स्वेच्छिक रक्तदान शिविरको आयोजना गरिने भएको छ। ब्रह्माकुमारीजले लायन्स क्लब अफ ग्याङटोक ग्रिन्स र ‘एक हात एक साथ’ सँगको सहकार्यमा बिहान ९:०० बजेदेखि सो कार्यक्रम सञ्चालन गर्न लागेको हो।
​उक्त शिविरमा एसटीएनएम अस्पताल, मनिपाल अस्पतालका साथै नाम्ची र सिङ्ताम जिल्ला अस्पतालका चिकित्सकहरूको प्राविधिक सहयोग रहनेछ। कार्यक्रममा सर्वसाधारणका लागि जनचेतना अभिवृद्धि, रक्तदानका लागि योग्यता सम्बन्धी जानकारी, नि:शुल्क रक्त परीक्षण तथा स्वेच्छिक रक्तदानको सुविधा उपलब्ध गराइनेछ।
​रगतको अभावका कारण कसैले पनि ज्यान गुमाउनु नपरोस् भन्ने उद्देश्यका साथ आयोजित यस शिविरमा योग्य तथा इच्छुक व्यक्तिहरूलाई स्वतःस्फूर्त रूपमा सहभागी भई रक्तदान गर्न आयोजक समितिले आग्रह गरेको छ।