नयाँ दिल्ली: मिस युनिभर्स इन्डिया २०२६ को ग्रान्ड फिनाले आइतबार, २३ अगस्ट २०२६ मा ‘पिंक सिटी’ जयपुरमा आयोजना गरिएको थियो। सौन्दर्य प्रतियोगितामा ५२ जना सुन्दरीले सहभागिता जनाएका थिए। प्रतियोगीहरूको मूल्याङ्कन गर्न विशेष निर्णायक समिति गठन गरिएको थियो, जसमा मनोरञ्जन क्षेत्रका चर्चित व्यक्तित्वहरू पनि सहभागी थिए। बलिउड अभिनेत्री सुष्मिता सेन, उर्वशी रौतेला र सेलिना जेटली निर्णायकका रूपमा सहभागी थिए।
टप–५ फाइनलिस्टमा तमिलनाडुकी वैष्णवी, गुजरातकी अनुश्री सतवालेकर, महाराष्ट्रकी तेजस्विनी श्रीवास्तव, केरलकी कैजिया लिज मैजो र उत्तराखण्डकी अनुभा वशिष्ठ रहेका थिए। राति २:५० बजे विजेताको नाम घोषणा गरिँदा केरलकी कैजिया लिज मैजोले मिस युनिभर्स इन्डिया २०२६ को ताज जितिन्।
मिस युनिभर्स इन्डिया २०२६ की विजेता
प्रतियोगिताको अन्तिम चरणमा प्रतियोगीहरूले निर्णायकहरूसामु ४० सेकेन्डको ‘क्लोजिङ रिमार्क’ प्रस्तुत गर्नुपर्ने थियो। पाँचै फाइनलिस्टले जीवनप्रतिको आफ्नो दृष्टिकोण, सामना गरेका चुनौती तथा भविष्यका योजनाबारे आफ्ना विचार प्रस्तुत गरे।
आफ्नो प्रभावशाली क्लोजिङ रिमार्कमार्फत कैजिया लिज मैजो निर्णायक समितिलाई प्रभावित गर्न सफल भइन् र यस वर्षको उपाधि आफ्नो नाममा पारिन्। मिस युनिभर्स इन्डिया २०२५ की विजेता मनिका विश्वकर्माले केरलकी कैजियाको शिरमा ताज पहिराइदिइन्। ताज पहिरिएपछि कैजिया निकै भावुक भएकी थिइन्।
तमिलनाडुकी वैष्णवीले दिइन् कडा टक्कर
केरलकी कैजियालाई तमिलनाडुकी वैष्णवीले कडा टक्कर दिइन्। उनी कैजियासँगै टप–२ मा पुगिन् र अन्ततः फर्स्ट रनर–अप बनिन्।
त्यस्तै, गुजरातकी अनुश्री सतवालेकर सेकेन्ड रनर–अप, महाराष्ट्रकी तेजस्विनी श्रीवास्तव थर्ड रनर–अप र उत्तराखण्डकी अनुभा वशिष्ठ फोर्थ रनर–अप घोषित भइन्।
यस वर्षकी विजेता कैजिया लिज मैजोले अब वर्षको अन्त्यमा प्युर्टो रिकोमा आयोजना हुने ७५औँ मिस युनिभर्स प्रतियोगितामा भारतको प्रतिनिधित्व गर्नेछिन्।