आदिवासी स्वतन्त्रता सेनानीहरूलाई श्रद्धाञ्जली अर्पण

​खर्साङ: पश्चिम बंगाल सरकारको आदिवासी विकास विभागद्वारा दार्जीलिंगको खर्साङस्थित गढीधुरा सामुदायिक भवनमा आज ‘हुल दिवस’ कार्यक्रम भव्य रूपमा आयोजना गरियो। कार्यक्रममा मुख्य अतिथिको रूपमा उपस्थित भई सांसद राजू विष्टद्वारा भारतको पहिलो आदिवासी स्वतन्त्रता संग्राम—’सान्थाल हुल’का अमर नायकहरू सिद्धु मुर्मु, कान्हु मुर्मु, चन्द मुर्मु, भैरव मुर्मु, फुलो मुर्मु र झानो मुर्मुप्रति भावपूर्ण श्रद्धाञ्जली अर्पण गरियो।
​यी अमर शहीदहरूको अदम्य साहस, त्याग र बलिदान अन्याय, शोषण र औपनिवेशिक शासनविरुद्धको प्रतिरोधको एउटा अनन्त गाथाको रूपमा सधैं जीवित रहनेछ। आदिवासी समुदाय सधैं भारतको सांस्कृतिक सम्पदा र राष्ट्र निर्माणको बलियो जग रहिआएको छ। उनीहरूको गौरवशाली इतिहासले समानता, सामाजिक न्याय, गरिमा र समावेशी विकासको मूल्य मान्यतालाई अक्षुण्ण राख्ने हाम्रो संकल्पलाई अझ सुदृढ बनाउँछ।
​केन्द्रमा आदरणीय प्रधानमन्त्री श्री नरेन्द्र मोदी जी र राज्यमा आदरणीय मुख्यमन्त्री श्री शुभेन्दु अधिकारी जीको नेतृत्वमा, ‘डबल इन्जिन’ भाजपा सरकार “विकसित भारत” को निर्माणका लागि निरन्तर प्रयासरत छ। यस अन्तर्गत आदिवासी र जनजाति समुदायका प्रत्येक परिवारले सम्मान, समान अवसर र समृद्धि प्राप्त गरून् भन्ने सुनिश्चित गरिँदैछ, सांसद राजू विष्टले जनाए।
​यसै कार्यक्रमको अवसरमा दार्जीलिंगको जीटीए क्षेत्रका जेहेन्दार अनुसूचित जनजाति (एसटी) का विद्यार्थीहरूलाई प्रदान गरिने ‘डा. बी.आर. अम्बेडकर मेधा पुरस्कार २०२६’ को पुरस्कार वितरण समारोहमा पनि सहभागिता जनाइयो र मेधावी छात्र-छात्राहरूलाई सम्मानित गरियो।