बारबाडोस: आईसीसी टी२० वर्ल्ड कपमा अष्ट्रेलियाले जीतको साथ अभियान शुरु गऱ्यो। बिहीवार बिहान खेलिएको ग्रुप बी-को म्याचमा अष्ट्रेलियाले ओमानलाई ३९ रनले पराजित गऱ्यो। खराब शुरुवातपछि अष्ट्रेलियालाई जीत दिलाउनमा अलराउण्डर मार्कस स्टोइनिसले महत्त्वपूर्ण भूमिका निर्वाह गरे, जसले पहिला अर्द्धशतक बनाएपछि ३ विकेट लिएर आफ्नो टीमलाई विजयी बनाए। केनसिंग्टन ओवल मैदानमा टस हारेर पहिला ब्याटिंग गर्दै अष्ट्रेलियाले धीमा शुरुवातपछि २० ओभरमा ५ विकेट गुमाएर १६४ रन बनायो। केवल ५० रनमा पहिलो तीन विकेट गुमाएर संकटमा पर्ने अष्ट्रेलियाई टीमलाई ओपनर डेविड वार्नर र स्टोइनिसले मिलेर सम्माजनक स्थितिमा पुऱ्याए। यी दुवैले अर्द्धशतक बनाए। वार्नर र स्टोइनिसले मिलेर चौथो विकेटको निम्ति १०२ रनको पार्टनरशीप गरे। यसमा स्टोइनिसले दुईवटा जीवनदानको फाइदा उठाउँदै ६ वटा छक्का र २ वटा चौकाको साथ ३६ बलमा अविजित ६७ रन बनाए। यसरी वार्नरले ५१ बल खेलेर ६ वटा चौका र एउटा छक्काको साथ ५६ रन बनाए। ट्रेविस हेडले १२, कप्तान मिचेल मार्शले १४ र टिम डेविडले अविजित ९ रन बनाए भने ग्लेन म्याक्सवेल शून्य रनमा आउट भए। ओमानका बलरहरूमा मेहरान खानले सर्वाधिक २ विकेट लिए। त्यसपछि ओमानको टीमले २० ओभरमा ९ विकेट गुमाएर १२५ रन मात्र बनाउन सक्यो। अष्ट्रेलियाको अनुभवी पेस आक्रमण अघि ओमानका अनुभवहीन ब्याटिंग लाइन अप्-ले असहाय आत्मसमर्पण गऱ्यो। अयान खानले सर्वाधिक ३६ रन बनाए जबकि मेहरान खानले २७ रनको योगदान दिए। ओमानको शीर्ष सातमा ५ जनाले त ८ रनभन्दा अधिकको स्कोर बनाउन सकेनन्। अष्ट्रेलियाई बलरहरूमा स्टोइनिसले सर्वाधिक ३ विकेट लिए। यसबाहेक मिचेल स्टार्क, नेथन एलिस र एडम जाम्पाले पनि २-२ विकेट हासिल गरे।