धेरै महत्वपूर्ण विषयमा सम्झौता

काठमाडौं: नेपाल र भारतबीच व्यापार, पारवहन तथा अवैध आवागमन नियन्त्रणसम्बन्धी अन्तरसरकारी उपसमितिको दुईदिने बैठक शुक्रबार भारतमा सम्पन्न भएको छ।
भारतको उद्योग तथा वाणिज्य मन्त्रालयका अनुसार, बैठकमा दुई देशबीच द्विपक्षीय व्यापारलाई सुदृढ बनाउने, पारवहन सुविधा उपलब्ध गराउने तथा आर्थिक सहकार्यसँग सम्बन्धित विभिन्न विषयमा विस्तृत छलफल भएको थियो।
यी क्षेत्रमा बजार पहुँच सहज बनाउने विषयमा छलफल
बैठकमा कृषि, दुग्धजन्य पदार्थ, खाद्य सामग्री, औषधि तथा चिकित्सा उपकरणको व्यापारलाई सहज बनाउने विषयमा छलफल भएको थियो। दुवै पक्षले यी क्षेत्रमा बजार पहुँच सहज बनाउन विभिन्न उपायबारे विचार–विमर्श गरेका थिए।
भन्सार प्रक्रियाको विद्युतीयकरणमा सहमति
दुवै देशले भन्सार प्रक्रियालाई सरल र छिटो बनाउन विभिन्न कदम चाल्ने सहमति जनाएका छन्। तीमध्ये:
आगमनपूर्व सूचनाको आदान–प्रदान
उत्पत्तिको प्रमाणपत्रको विद्युतीय प्रमाणीकरण,
भन्सार प्रणालीको स्वचालन,
तथा भन्सार प्रक्रियाको विद्युतीकरण रहेका छन्।
रेल, सडक र स्थल बन्दरगाहको प्रभावकारी उपयोगमा सहमति
बैठकमा रेल तथा सडक सञ्जाल, एकीकृत जाँच चौकी तथा स्थल बन्दरगाहको पूर्वाधारको अझ प्रभावकारी उपयोग सुनिश्चित गर्ने विषयमा पनि सहमति भएको थियो। यसको उद्देश्य द्विपक्षीय तथा पारवहन व्यापारमा देखिने सञ्चालनसम्बन्धी अवरोध हटाउनु हो।
अवैध व्यापार र ठगीविरुद्ध संयुक्त कदम
नेपाल र भारतले वैध सीमापार व्यापारलाई प्रोत्साहन गर्न तथा अवैध व्यापार र व्यापारिक ठगी नियन्त्रण गर्न आपसी सहयोग बढाउने विषयमा पनि सहमति जनाएका छन्।
बैठकको अन्त्यमा दुवै देशले नेपाल–भारत द्विपक्षीय व्यापार, पारवहन व्यवस्था तथा आर्थिक सम्बन्धलाई थप सुदृढ र विस्तार गर्ने आफ्नो प्रतिबद्धता दोहोर्‍याएका छन्।
बैठकको नेतृत्व
नेपाली प्रतिनिधिमण्डलको नेतृत्व उद्योग, वाणिज्य तथा आपूर्ति मन्त्रालयका सहसचिव बुधा बहादुर गुरुङले गरेका थिए।
भारतीय प्रतिनिधिमण्डलको नेतृत्व वाणिज्य विभागका सहसचिव उज्ज्वल कुमार घोषले गरेका थिए।