​गान्तोक: सिक्किमका राज्यपाल ओम प्रकाश माथुरले शिक्षक दिवसको पूर्वसन्ध्यामा राज्यका सम्पूर्ण शिक्षक समुदाय तथा शिक्षण जगतप्रति हार्दिक बधाई एवं शुभकामना व्यक्त गरेका छन्।
​आफ्नो शुभकामना सन्देशमा राज्यपालले पूर्व राष्ट्रपति, महान् शिक्षाविद् तथा दार्शनिक डा. सर्वपल्ली राधाकृष्णनको जयन्तीका रूपमा मनाइने शिक्षक दिवस ज्ञान, करुणा र समर्पणको उत्सव रहेको बताए। शिक्षकले राष्ट्र निर्माणको महान् सोचका साथ सम्पूर्ण समाजलाई नै नयाँ र सही दिशा दिन सक्ने प्रेरणा यस दिवसले प्रदान गर्ने उनले उल्लेख गरे।
​राज्यपाल माथुरले शिक्षकहरूले केवल किताबी ज्ञान वा अक्षर सिकाउने मात्र नभई युवाहरूमा नैतिक मूल्य-मान्यताको विकास गराउँदै उनीहरूलाई जिम्मेवार नागरिक र भविष्यका सच्चा मार्गदर्शक बनाउन अतुलनीय भूमिका खेल्ने बताए।
​यस शुभ अवसरमा उनले उत्कृष्ट सेवाका लागि ‘राष्ट्रिय शिक्षक पुरस्कार’ तथा ‘राज्य शिक्षक पुरस्कार’ बाट सम्मानित हुने सम्पूर्ण कर्मठ शिक्षकहरूलाई विशेष बधाई दिएका छन्। यो उपलब्धि शिक्षकहरूको निष्ठा, कठोर परिश्रम र शिक्षाप्रतिको समर्पणको जीवन्त प्रमाण भएको उनले बताए।
​भौगोलिक रूपमा कठिन परिस्थितिमा रहेका सिक्किमका दूरदराजका क्षेत्रहरूमा समेत विद्यार्थीहरूको उज्ज्वल भविष्य निर्माणका लागि निरन्तर खट्ने सम्पूर्ण शिक्षकहरूप्रति उनले गहिरो कृतज्ञता व्यक्त गरे। साथै, शिक्षक दिवसको यस पावन अवसरमा सम्पूर्ण राज्यवासीले शिक्षकहरूको योगदानको कदर गर्दै सिक्किमलाई शिक्षाको क्षेत्रमा नयाँ उचाइमा पुर्‍याउने संकल्प लिनुपर्ने आह्वानसमेत उनले गरे।