शव नभेटिँदा पनि परिवारले गर्न थाले प्रतीकात्मक अन्त्येष्टि

काठमाडौं: नेपालमा आएको विनाशकारी बाढी र पहिरोको एक साता बितिसक्दा पनि सयौँ परिवार आफ्ना बेपत्ता आफन्त फर्किने आशामा छन्। तर खोजी अभियान लम्बिँदै जाँदा धेरै परिवारले आफन्त जीवित भेटिने आशा गुमाउन थालेका छन्। शव फेला नपरे पनि उनीहरूले हिन्दू संस्कारअनुसार प्रतीकात्मक अन्त्येष्टि गर्न थालेका छन्। बेपत्ता व्यक्तिको परालको पुत्ला बनाएर त्यसलाई दाहसंस्कार गर्ने गरिएको छ।
बाढीबाट सबैभन्दा बढी प्रभावित रसुवा जिल्लाको अवस्था भयावह बनेको छ। सरकारी अधिकारी ध्रुवप्रसाद अधिकारीले विपत्तिको स्तर कल्पनाभन्दा बाहिर रहेको बताउँदै वास्तविकताको सामना गर्नुपर्ने अवस्था आएको बताएका छन्। प्रभावित क्षेत्रमा उद्धार टोली पुग्नै १२ घण्टाभन्दा बढी समय लागेको थियो।
बेपत्ताको खोजीका क्रममा जलविद्युत् आयोजनाका माटो र भग्नावशेषले पुरिएका सुरुङमा समेत उद्धार कार्य जारी छ। कतै ड्रिलिङ त कतै विस्फोट गराएर बाटो खोल्ने प्रयास भइरहेको छ। सुरुङबाट हालसम्म जीवित व्यक्ति फेला नपरे पनि केही शव निकालिएका छन्।
काठमाडौंमा बेपत्ता आफन्तको पहिचानका लागि ठूलो संख्यामा मानिस डीएनए नमुना दिन पुगेका छन्। शवगृहमा ठाउँ अभाव भएपछि केही शव दाहसंस्कार तथा अन्त्येष्टि गरिसकिएको छ।
आफ्ना पति बेपत्ता भएपछि प्रतीकात्मक अन्त्येष्टि गरेकी डोल्मा नेवार तामाङले आत्माको शान्तिका लागि यस्तो संस्कार गर्नुपरेको बताइन्।