​सिलगढी: पोस्टमार्टम रिपोर्ट उपलब्ध गराइदिने बहानामा घुस मागेको र लिएको आरोप उत्तर बङ्गाल मेडिकल कलेज तथा अस्पताल (एनबीएमसीएच) का एक कर्मचारीमाथि लागेको छ। उजुरीका आधारमा पश्चिम बङ्गाल प्रहरीको भ्रष्टाचार निवारण शाखा (एसीबी) ले अस्पताल परिसरमा पासो थापेर आरोपी कर्मचारीलाई रु. ३,००० घुस लिँदै गर्दा रंगेहात पक्राउ गरेको छ।
​एसीबीका अनुसार मृतकका परिवारका तर्फबाट उजुरी परेपछि अधिकारीहरूले बुधबार उक्त कारबाही गरेका हुन्। कारबाहीका क्रममा अस्पतालका ल्याबोरेटरी-कम-मर्चरी असिस्टेन्टलाई उजुरीकर्ताबाट घुस लिइरहेकै अवस्थामा नियन्त्रणमा लिइएको हो। आरोपीलाई हिरासतमा लिएर घटनाबारे थप अनुसन्धान अघि बढाइएको एसीबीले जनाएको छ।
​उल्लेखनीय छ, भ्रष्टाचारविरुद्ध एसीबीले आफ्नो कारबाहीलाई निरन्तरता दिँदै आएको छ। यसअघि ३१ अगस्टका दिन हावडाको उलुबेरियामा रु. २०,००० घुस लिँदै गर्दा एक सरकारी अधिकारीलाई पनि एसीबीले पक्राउ गरेको थियो। उक्त घटनामा घुसको रकमसमेत बरामद गरी थप कानुनी कारबाही अघि बढाइएको थियो।