​गान्ताेक: सिक्किम क्रान्तिकारी मोर्चा (एसकेएम) स्पोर्ट्स विङले राष्ट्रिय खेलकुद दिवस २०२६ को अवसरमा आगामी अगस्ट २९ तारिख ग्याङटोकमा ‘५-के मुख्यमन्त्री रन’ (५ किलोमीटर दौड) आयोजना गर्ने भएको छ। मुख्यमन्त्री प्रेमसिंह तामाङ (गोले) को मुख्य आतिथ्यमा उक्त कार्यक्रम सञ्चालन हुनेछ।
​युवा तथा आम नागरिकहरूमा शारीरिक स्वस्थता, आरोग्य र खेलकुदप्रतिको रुचि अभिवृद्धि गर्ने उद्देश्यका साथ आयोजना गर्न लागिएको यो दौड ग्याङटोकस्थित रिज पार्कबाट सुरु हुनेछ। सहभागीहरूलाई बिहान ५:३० बजेभित्रै रिज पार्क पुग्न र बिहान ६:३० बजे दौडको झन्डोत्तोलन (फ्ल्याग-अफ) हुने आयोजकले जनाएको छ।
​दौडको मार्ग रिज पार्कबाट सुरु भई जिरो पोइन्ट, वज्र, पुनः जिरो पोइन्ट, भानु पथ, दुकिथ पान पसल, सचिवालय, प्यालेस गेट हुँदै पुनः रिज पार्कमा पुगेर समापन हुनेछ।
​दर्ता भएका सहभागीहरूका लागि बिब वितरण अगस्ट २८ तारिखका दिन ग्याङटोकको एमजी मार्गमा बिहान ११:०० बजेदेखि अपराह्न ५:०० बजेसम्म गरिनेछ। आयोजक एसकेएम स्पोर्ट्स विङले तोकिएको समयमै बिब संकलन गरी कार्यक्रमका दिन बिहानै उपस्थित हुन आग्रह गरेको छ।