पोर्ट अफ स्पेन: पाकिस्तानले वेष्ट इण्डिजविरुद्ध दोस्रो क्रिकेट टेस्ट म्याचमा ८ विकेटले जीत हासिल गऱ्यो। यस जीतले पाकिस्तानलाई दोहोरो फाइदा प्राप्त भयो। यस जीतको साथ पाकिस्तानले वर्ल्ड टेस्ट च्याम्पियनशीप (डब्ल्यूटीसी) अंक तालिकामा एक स्थानको सुधार गऱ्यो भने टोलीले विदेशी माटोमा ३ सालदेखि जारी जीतको खड़ेरीलाई पनि समाप्त गऱ्यो। बाबर आजमको कप्तानीमा हासिल भएको यस जीतले टोलीको आत्मविश्वास अवश्यै बढ़ाउनेछ। वेष्ट इण्डिज र पाकिस्तानबीच २ वटा टेस्ट म्याचको सीरीज १-१-को बराबरीमा समाप्त भयो। दोस्रो टेस्ट शुरु हुन अघिसम्म पाकिस्तान डब्ल्यूटीसी तालिकामा नवौं तथा अन्तिम स्थानमा रहेको थियो। दोस्रो टेस्टमा जीतपछि पाकिस्तान आठौं स्थानमा पुगेको छ। पाकिस्तानको जीत प्रतिशत (पीसीटी) बढ़ेर २२.२२ पुगेको छ, जबकि वेष्ट इण्डिज चाहिँ झरेर नवौं स्थानमा रहन पुग्यो। यसरी यो पाकिस्तानको विदेशी माटोमा लगभग ३ सालपछि पहिलो टेस्ट म्याच जीत हो। यसअघि पाकिस्तानले अन्तिमपल्ट जुलाई २०२३-मा श्रीलंकाविरुद्ध विदेशी माटोमा टेस्ट म्याच जितेको थियो। त्यसपछि टोलीले विदेशी माटोमा ८ वटा टेस्ट म्याच खेलेर एउटा पनि जितेको थिएन।
क्वीन्स पार्क ओवल मैदानमा वेष्ट इण्डिजले पहिलो ईनिंग्समा ३४४ रन बनाएको थियो। त्यसपछि पाकिस्तानले अब्दुल्ला शफीक (अविजित १६०)-को शतकको सहायताले ३८७ रन बनाएर पहिलो ईनिंग्सको आधारमा ४३ रनको बढ़त हासिल गरेको थियो। दोस्रो ईनिंग्समा चाहिँ क्यारेबियन टोलीको ब्याटिंग क्रम ध्वस्त भयो अनि टोली केवल ११७ रन बनाएर अलआउट भयो। पाकिस्तानको यस जीतमा स्पिनरहरू अली उस्मान र साजिद खानको महत्त्वपूर्ण योगदान रह्यो। यी दुईजनाले वेष्ट इण्डिजको दोस्रो ईनिंग्समा ४-४ विकेट लिए। जीतको निम्ति ७५ रनको लक्ष्यलाई पीछा गर्दै पाकिस्तानको शुरुवात असल रहेन। इमाम-उल-हक चाँड़ै आउट भए अनि अजान अवैसले पनि ठूलो ईनिंग्स खेल्न सकेनन्। त्यसपछि कप्तान बाबर आजम र अब्दुल्ला शफीकले मिलेर मोर्चा सम्हाले। यी दुईजना ब्याटर २४-२४ रनमा अविजित रहे अनि पाकिस्तानले २ विकेटमा ७७ रन बनाएर म्याच जित्यो। यसअघि खेलिएको पहिलो टेस्ट म्याचमा वेष्ट इण्डिजले पाकिस्तानलाई ९० रनले पराजित गरेको थियो।