नामची: ​६५औँ प्रि-सुब्रतो कप अन्तर्राष्ट्रिय फुटबल प्रतियोगिता-२०२६ अन्तर्गत बालिका उप-१७ राज्यस्तरीय अन्तर-विद्यालय फुटबल प्रतियोगिता बुधबार नामचीस्थित भाइचुङ रङ्गशालामा भव्य रूपमा सम्पन्न भएको छ।​समापन समारोहमा सिक्किम सरकारको खेलकुद तथा युवा मामिला विभागअन्तर्गत सिक्किम युवा विकास बोर्डका अध्यक्ष बसन्त योन्जन मुख्य अतिथिका रूपमा उपस्थित हुनुहुन्थ्यो।​गत १८ जुलाईदेखि २२ जुलाईसम्म सञ्चालित यस प्रतियोगितामा सिक्किमका छवटै जिल्लाका टोलीहरूले सहभागिता जनाएका थिए। प्रतियोगिताले युवा फुटबल खेलाडीहरूलाई आफ्नो खेल कौशल र खेल भावना प्रदर्शन गर्ने उत्कृष्ट मञ्च प्रदान गरेको थियो।​बुधबार खेलिएको फाइनल भिडन्तमा पीएम श्री सरकारी मावि सोरेङले एकतर्फी प्रदर्शन गर्दै नर्थ सिक्किम एकेडेमी मावि मङ्गनलाई १०-० को फराकिलो मतान्तरले पराजित गरी च्याम्पियन ट्रफी कब्जा गर्‍यो।​यो जितसँगै पीएम श्री सरकारी मावि सोरेङले अब नयाँ दिल्लीमा आयोजना हुने ६५औँ सुब्रतो कप अन्तर्राष्ट्रिय फुटबल प्रतियोगितामा सिक्किम राज्यको प्रतिनिधित्व गर्ने अवसर प्राप्त गरेको छ।​

समापन कार्यक्रममा खेलकुद तथा युवा मामिला विभागका उप-निर्देशक बसन्त प्रधान, नर्थ सिक्किम एकेडेमी माविका निर्देशक नामग्याल पिन्सो काजी, शारीरिक शिक्षा शिक्षकहरू, प्रशिक्षकहरू, विद्यार्थी तथा खेलप्रेमीहरूको बाक्लो उपस्थिति रहेको नामची जिल्ला सूचना अधिकारीले जनाएका छन्।