​सिलगढी: गोप्य सूचनाका आधारमा मतिगाढा थाना पुलिसको टोलीले छापा मारेर प्रतिबन्धित कफ सिरपसहित एक जनालाई नियन्त्रणमा लिएको छ। दार्जिलिङ जिल्लाको मतिगाढा थानाअन्तर्गत गुलमोहर अपार्टमेन्ट नजिकै रहेको निश्चिन्तपुर चियाबारी क्षेत्रमा पुलिसले विशेष अभियान चलाएको थियो।
​कारबाहीका क्रममा मतिगाढा थानाअन्तर्गत वेबेल आईटी पार्क नजिकै सिमुलतला निवासी २५ वर्षीय पलाश ढालीलाई पक्राउ गरिएको पुलिसले जनाएको छ। उनीबाट खानतलासी गर्दा २० वटा (प्रत्येक १०० एमएल) प्रतिबन्धित फेन्सेडिल कफ सिरपका बोतल र एउटा एन्ड्रोइड मोबाइल फोन बरामद गरी जफत गरिएको छ।
​पक्राउ परेका व्यक्तिविरुद्ध लागूऔषध तथा मनोरोधक पदार्थ ऐन (एनडिपिएस एक्ट) का सम्बन्धित धाराअन्तर्गत मुद्दा दर्ता गरिएको छ। एनडिपिएस ऐनका सम्पूर्ण प्रावधानहरूको कडाइका साथ पालना गर्दै कानुनी प्रक्रिया पूरा गरिएको र यस घटनाबारे थप अनुसन्धान जारी रहेको पुलिसले जनाएको छ।
​