लण्डन: ईंग्ल्याण्डविरुद्ध लर्डसको ऐतिहासिक मैदानमा खेलिने एकमात्र महिला टेस्ट म्याच अघि भारतीय टीमलाई ठूलो झट्का लागेको छ। टीमकी स्टार ओपनिंग ब्याटर प्रतिका रावल चोटले गर्दा म्याचबाट बाहिर भएकी छन्। गत हप्ता टण्टनमा ईंग्ल्याण्ड ए विरुद्ध इण्डिया ए बाट खेल्दा २५ वर्षीय प्रतिकाको घुँड़ामा गम्भीर चोट लागेको थियो। त्यही चोटले गर्दा उनलाई टेस्ट म्याचको निम्ति अनुपलब्ध घोषित गरिएको छ। भारतीय महिला क्रिकेट टीमका मुख्य प्रशिक्षक अमोल मजूमदारले यस खबरको पुष्टि गरेका छन्। प्रतिका रावल बाहिर भएपछि चयनकर्ताहरूले प्रिया पूनियालाई टीममा सामेल गरेका छन्। देब्रे हातकी ब्याटर प्रियाले ईंग्ल्याण्ड ए विरुद्ध सीरीजमा असाधारण प्रदर्शन गरेकी थिइन्। उनी वनडे सीरीजमा भारत ए-को तर्फबाट सर्वाधिक रन बनाउने ब्याटर रहेकी थिइन्। प्रियाले ५७-को औसतले १७१ रन बनाएकी थिइन्, जसमा ८७ रन उनको सर्वोच्च स्कोर रह्यो। प्रियाले आफ्नो अन्तिम अन्तर्राष्ट्रिय म्याच दिसम्बर २०२४-मा अष्ट्रेलिया यात्रामा खेलेकी थिइन्। यसरी लगभग डेढ़ वर्षपछि उनी टीममा फर्किएकी छन्। साल २०१९-मा पदार्पण गर्ने प्रियाले अहिलेसम्म भारतको निम्ति १२ वटा वनडे र ३ वटा टी२० इण्टरनेशनल म्याच खेलेकी छन्। यसबीच प्रतिका रावल बाहिर हुनु टीम इण्डियाको निम्ति ठूलो झट्का हो कारण गत एक सालमा उनी शीर्ष क्रममा टीमको सबैभन्दा निर्भरयोग्य ब्याटर बनेर अघि आएकी थिइन्। उनले यस साल पर्थको वाका मैदानमा अष्ट्रेलियाविरुद्ध टेस्ट पदार्पण गर्दै दोस्रो ईनिंग्समा अर्द्धशतक बनाएकी थिइन्। लर्डसको मैदानमा भारतको यो पहिलो ऐतिहासिक महिला टेस्ट म्याच हुनेछ।