​​गान्तोक: गेजिङ जिल्लाको याङ्थाङ निर्वाचन क्षेत्रका सत्तारुढ सिक्किम क्रान्तिकारी मोर्चा (एसकेएम) का दुईजना कर्मठ महिला नेतृहरूले पार्टी परित्याग गरी सिक्किम डेमोक्रेटिक फ्रन्ट (एसडीएफ) मा प्रवेश गरेका छन्। एसडीएफको केन्द्रीय कार्यालय गान्तोकमा पार्टी अध्यक्ष पवन चामलिङसँग भेट गरी उनीहरू औपचारिक रूपमा पार्टीमा सामेल भएका हुन्।
​अध्यक्ष चामलिङसँगको भेटका क्रममा उनीहरूले एसकेएम सरकारको नीति र कार्यशैलीप्रति तीव्र असन्तुष्टि व्यक्त गरे। सत्तारुढ दलले सिक्किमको प्रशासनिक र सामाजिक व्यवस्थालाई अस्तव्यस्त बनाएको, ग्रामीण जनतालाई गम्भीर आर्थिक सङ्कट र कठिनाइमा धकेलेको उनीहरूको आरोप थियो। सन् २०१९ अघि सिक्किममा सहज परिस्थिति रहेको उल्लेख गर्दै उनीहरूले वर्तमान सरकारको गलत नीतिका कारण राज्यमा अनिकाल र महँगी बढेको दाबी गरे। एसकेएम सरकारले लिम्बु र तामाङ समुदायलाई सिट दिने, चाडपर्व खर्चबापत ५० हजार रुपैयाँ उपलब्ध गराउने र बेरोजगार युवाहरूलाई १० हजार रुपैयाँ भत्ता दिने जस्ता आफ्ना पुराना बाचाहरू पूरा नगरेर जनतालाई झुक्याएको उनीहरूले बताए।
​एसडीएफमा प्रवेश गरेका नेतृहरूले विगतमा पवन चामलिङको नेतृत्वकालमा सबै जातजाति, धर्म, लिङ्ग र वर्गले समान न्याय पाएको स्मरण गर्दै वर्तमान सरकारमा चम्चा र धनी वर्गको मात्र हित भइरहेको गुनासो गरे। बिग्रँदो सिक्किमलाई बचाउन चामलिङको नेतृत्व अपरिहार्य ठानेर आफूहरूले सत्तासीन दल त्याग्ने निर्णय गरेको उनीहरूले प्रस्ट पारे।
​नवप्रवेशीहरूलाई हार्दिक स्वागत गर्दै एसडीएफ अध्यक्ष पवन चामलिङले सिक्किम र सिक्किमेली जनताको वर्तमान र भविष्य सुरक्षित राख्ने एकमात्र विकल्प एसडीएफ मात्र भएको दाबी गरे। सिक्किमको पहिचान, स्वतन्त्रता र विशेष अधिकार अहिले खतरामा परेको भन्दै उनले राज्य बचाउन सबै सिक्किमप्रेमी नागरिक एकजुट हुनुपर्नेमा जोड दिए।

चामलिङले वर्तमान सरकारको अदूरदर्शी नीतिका कारण राज्य अत्यधिक ऋणको बोझमा थिचिएको र भ्रष्टाचार संस्थागत भएको आरोप समेत लगाए।
​प्रजातन्त्रमा जनता नै सरकार बनाउने र भत्काउने वास्तविक शक्ति भएको उल्लेख गर्दै चामलिङले असल नेता र पार्टी पहिचान गरेर एसडीएफसँग जोडिन सम्पूर्ण सिक्किमेली जनतालाई आह्वान गरे।