तालको सौन्दर्यीकरण र साहसिक गतिविधिलाई प्राथमिकता

​सिलगढी: पश्चिम बङ्गाल सरकारले प्रसिद्ध पर्यटकीय स्थल मिरिकलाई विश्वस्तरीय गन्तव्यका रूपमा विकास गर्न पहिलो चरणमा करिब भारु १०० करोडको महत्त्वाकाङ्क्षी परियोजना अघि सारेको छ। मिरिक ताल (सुमेन्दु लेक) को सौन्दर्यीकरणका साथै नयाँ साहसिक तथा मनोरञ्जनात्मक गतिविधिहरू थप गरी यहाँको पर्यटन पूर्वाधारलाई सुदृढ बनाउने यस योजनाको मुख्य लक्ष्य रहेको छ।
​राज्यका पर्यटन मन्त्री डा. शङ्कर घोषका अनुसार परियोजनाको विस्तृत परियोजना प्रतिवेदन (डीपीआर) तयार भइसकेको छ। केन्द्रीय सरकारबाट वित्तीय स्वीकृति र बजेट विनियोजन भएलगत्तै निर्माण कार्य सुरु हुने उनले बताए। पहिलो चरणको काम सम्पन्न भएपछि थप लगानीसहित दोस्रो चरणका योजनाहरू पनि अघि बढाइने मन्त्री घोषले जानकारी दिए।
​मनोरम ताल, हरियाली पहाड, चिया बगान, सुन्तला खेती र शान्त वातावरणका कारण आन्तरिक तथा बाह्य पर्यटकहरूको रोजाइमा पर्दै आएको मिरिकलाई आधुनिक पर्यटकीय पूर्वाधारमार्फत अझै आकर्षक बनाइने सरकारी योजना छ। गुरुयोजना अन्तर्गत मिरिक तालको सौन्दर्यीकरण, पर्यटकका लागि आधुनिक सुविधाहरू, साहसिक खेलकुद, प्रकृतिको दृश्यावलोकनका लागि ‘नेचर ट्रेल’ र भ्यु-पोइन्टहरूको निर्माण गरिनेछ।
​यो परियोजनाले पर्यटकको सङ्ख्या बढाउनुका साथै स्थानीय होटल व्यवसायी, यातायात चालक तथा साना उद्यमीहरूका लागि नयाँ आर्थिक अवसर सिर्जना गर्ने अधिकारीहरूको विश्वास छ। मन्त्री घोषले उत्तर बङ्गालको समग्र पर्यटन क्षेत्रको विकासका लागि राज्य सरकार प्रतिबद्ध रहेको उल्लेख गर्दै मिरिकसँगै दार्जिलिङलाई पनि अन्तर्राष्ट्रिय स्तरमा थप स्थापित गरिने बताए।
​पर्यटन विभागका अनुसार यो योजनाको कार्यान्वयनपछि मिरिक साहसिक तथा प्रकृति पर्यटनको प्रमुख केन्द्र बन्नेछ, जसले उत्तर बङ्गालको आर्थिक विकास र स्थानीय रोजगार सिर्जनामा ठुलो टेवा पुर्‍याउनेछ।