एसडीएमद्वारा स्थलगत निरीक्षण, सडक र पुल पुनर्निर्माण गर्न निर्देशन

जोङ्गु: ​गत २७ जूनको राति परेको मुसलधारे वर्षाका कारण जोङ्गु क्षेत्रका विभिन्न स्थानमा ठुलो क्षति पुगेको छ। बाढी र पहिरोले पुर्‍याएको क्षतिको यथार्थ विवरण संकलन गर्न तथा वस्तुस्थिति बुझ्न जोङ्गुका महकुमा अधिकारी गेडियन लेप्चाले आज प्रभावित क्षेत्रहरूको स्थलगत निरीक्षण गर्नुभयो। निरीक्षण टोलीमा पञ्चायत अध्यक्ष सोनाम छिरिङ लेप्चा, युवा नेता तेन्जिङ ग्यात्सो लेप्चा र अन्य स्थानीय अधिकारीहरू सहभागी थिए।
​निरीक्षण टोलीले सर्वप्रथम तल्लो जोङ्गुको फिदाङस्थित ‘फि खोला’ को भ्रमण गरेको थियो, जहाँ १०७ आरसीसी ग्रिफ (जीआरईएफ) द्वारा जडान गरिएको बेली ब्रिज (पुल) बाढीले पूर्ण रूपमा बगाएको छ। पुल बगेपछि यस क्षेत्रको सवारी साधन तथा पैदल यात्रीहरूको आवतजावत ठप्प भएको छ। एसडीएम लेप्चाले ग्रिफका अधिकारीहरूलाई बाढीको पानी घट्नेबित्तिकै यातायात पुनः सञ्चालनका लागि तत्काल आवश्यक कदम चाल्न निर्देशन दिनुभएको छ।
​सडक सञ्जाल अवरुद्ध, प्रविधिक टोलीलाई पत्राचार
​त्यसपछि टोलीले लुम गोर साङ्तोक जीपीयूपी अन्तर्गत साग्योङ र साङ्तोक वार्ड जोड्ने फि खोलाकै अर्को पुलको निरीक्षण गर्‍यो। यस पुलको पहुँच मार्ग (अप्रोच रोड) भासिएका कारण साङ्तोक र साग्योङ वार्ड अन्य क्षेत्रबाट पूर्ण रूपमा विच्छेद भएका छन्। सडकमार्ग छिटोभन्दा छिटो सुचारु गर्नका लागि पीएमजीएसवाईका सम्बन्धित अधिकारीहरूलाई तत्काल आवश्यक पत्राचार गरिएको छ।
​एसडीएम नेतृत्वको टोलीले तार्याङ वार्ड तथा नन वार्ड अन्तर्गत पर्ने र्योत खोलामा सडक भत्किएको क्षेत्रको पनि निरीक्षण गर्‍यो। सो क्रममा साङ्दोङ वार्डस्थित विद्यालय जाने विद्यार्थीहरूका लागि उक्त जोखिमपूर्ण सडक खण्ड पार गर्दा उच्च सतर्कता अपनाउन स्थानीय वार्ड पञ्चायतलाई निर्देशन दिइएको छ। सडकमा बाढीको पानी जम्न नदिन र क्षति रोक्नका लागि आवश्यक नाली (ड्रेन) निर्माणसहित सडक मर्मत गर्न पीएमजीएसवाईलाई निर्देश गरिएको छ।
​नागरिकलाई सतर्क रहन र यात्रा नगर्न अपील
​जोङ्गु महकुमा प्रशासनले प्रभावित मार्गहरूबाट यात्रा गर्दा पूर्ण सावधानी अपनाउन स्थानीय बासिन्दाहरूलाई सचेत गराएको छ। साथै, पञ्चायतहरूका माध्यमबाट स्थानीय जनतालाई सम्भव भएसम्म आवश्यक कामबाहेक यात्रा नगर्न र सतर्क रहन जोडदार अपील गरिएको छ।