सिक्किमका सांसद इन्द्रहाङ सुब्बाद्वारा सक्रिय सहभागिता

​नयाँ दिल्ली: सिक्किमका लोकसभा सांसद इन्द्रहाङ सुब्बाले नयाँ दिल्लीमा आयोजित संयुक्त संसदीय समिति (जेपीसी)-को एउटा महत्त्वपूर्ण अध्ययन भ्रमण र परामर्श कार्यक्रममा सक्रिय सहभागिता जनाउनु भएको छ।
​सांसद सुब्बा हाल भारतीय संसद्को ‘संविधान (१३०औँ संशोधन) विधेयक’, ‘जम्मु र कश्मिर पुनर्गठन (संशोधन) विधेयक, २०२५’ र ‘केन्द्रशासित प्रदेश सरकार (संशोधन) विधेयक, २०२५’- को सूक्ष्म जाँचबुझ गरिरहेको संयुक्त संसदीय समितिका एक प्रमुख सदस्य हुनुहुन्छ।
​सांसद एवं जेपीसी अध्यक्ष श्रीमती अपराजिता सारङ्गीको अध्यक्षतामा भएको यस अध्ययन भ्रमणका क्रममा समितिले दिल्ली सचिवालयमा विभिन्न सरोकारवालाहरूसँग चरणबद्ध कुराकानी र छलफल गरेको छ।
​कार्यक्रम अवधिभर समितिले दिल्ली राष्ट्रिय राजधानी क्षेत्र (एनसीटी) सरकार, केन्द्रीय गृह मन्त्रालय, कानुन तथा न्याय मन्त्रालयका प्रतिनिधिहरूका साथै राष्ट्रिय मानव अधिकार आयोग (एनएचआरसी), गुरु गोबिन्द सिंह इन्द्रप्रस्थ विश्वविद्यालय र ‘कमन कज’ नामक नागरिक समाज सङ्गठनका प्रतिनिधिहरूसँग गहन विचार-विमर्श गरेको बुझिएको छ। यसका साथै समितिले दिल्लीका मुख्यमन्त्रीसँग पनि भेट गरी प्रस्तावित कानुनी संशोधनका प्रभाव, शासन व्यवस्था र प्रशासनिक मामिलाहरूमाथि विस्तृत छलफल गरेको छ।
​यी महत्त्वपूर्ण विधेयकहरूको व्यापक समीक्षा गर्न र संसद्‌मा ठोस सिफारिसहरू प्रस्तुत गर्नका लागि समितिको यो अध्ययन भ्रमणलाई निकै महत्त्वपूर्ण मानिएको छ।