मुख्यमन्त्रीद्वारा रुमटेक गुम्बा पुगेर विशेष पूजा-अर्चना र विश्व शान्तिको कामना

​गान्तोक: परमपूजनीय सत्रौँ ग्याल्वाङ कर्मापा उग्येन थ्रिन्ले दोर्जे ज्यूको पावन एवं शुभ जन्मोत्सवको अवसरमा सिक्किमका माननीय मुख्यमन्त्री प्रेमसिंह तामाङले पूर्वी सिक्किमस्थित ऐतिहासिक एवं पवित्र रुमटेक गुम्बाको भ्रमण गरी विशेष पूजा-अर्चना गर्नुभएको छ। मुख्यमन्त्रीले गुम्बा भ्रमणका केही श्रद्धाभक्तिले भरिएका तस्विरहरू आफ्नो सामाजिक सञ्जालमा साझा गर्दै यस विषयमा जानकारी गराउनुभएको हो।
​भ्रमणका क्रममा मुख्यमन्त्रीले धर्मगुरु परमपूजनीय बाह्रौँ गोश्री ग्याल्छाप रिन्पोछेज्यूको पवित्र उपस्थितिमा पूजा-अर्चना गरी आशीर्वाद ग्रहण गर्ने सौभाग्य प्राप्त गर्नुभयो।
​यस पवित्र घडीमा मुख्यमन्त्री गोलेले परमपूजनीय सत्रौँ कर्मापाज्यूको सुस्वास्थ्य, दीर्घायु र निरन्तर आध्यात्मिक मार्गदर्शनको कामना गर्नुभयो। साथै, उहाँले विश्वभरिका सम्पूर्ण प्राणीहरूको सुख, शान्ति, आपसी सद्भाव र कल्याणका लागिसमेत प्रार्थना गर्नुभएको छ।

​मुख्यमन्त्रीले आफ्नो सन्देशमा अगाडि लेख्नुभएको छ,
“धर्मका यी शाश्वत शिक्षाहरूले हाम्रो जीवनलाई सधैँ आलोकित गरिरहुन्, र हामीलाई करुणा, प्रज्ञा (ज्ञान) एवं विश्वबन्धुत्वको मार्गतिर डोर्‍याइरहुन्। हामी सधैँ यी महान् मूल्य मान्यताहरूलाई आत्मसात् गर्दै अझ बढी शान्तिपूर्ण, सुखी र करुणामयी संसार निर्माण गर्नमा आफ्नो योगदान दिइरहन सकौँ।”
​मुख्यमन्त्रीको यस धार्मिक भ्रमण र जन्मोत्सवको उल्लासले गर्दा आज रुमटेक गुम्बा क्षेत्रमा बौद्धमार्गी एवं श्रद्धालुहरूको बाक्लो उपस्थिति रहेको थियो।