​गान्तोक: सिक्किम डेमोक्रेटिक फ्रण्ट (एसडीएफ) पार्टीका अध्यक्ष पवन चामलिङले वर्तमान सरकारमाथि कडा प्रहार गर्दै परिवर्तनको नाममा आएको सरकारले जनतालाई कङ्गाल मात्र नबनाएर राज्यको धरोहर र पहिचान समेत सिध्याएको गम्भीर आरोप लगाएका छन्।
​वर्तमान शासक दललाई ‘जनविरोधी’ को संज्ञा दिँदै पूर्व मुख्यमन्त्री चामलिङले भने, “जनतासँग सरकारलाई उखेलेर फ्याँक्ने तागत हुन्छ, अब जनताले आफ्नो शक्ति आफै चिन्नुपर्छ।”
​पैतृक थलो पुगेर बुझे जनताको दुखेसो
​सामाजिक भ्रमणको क्रममा आज एसडीएफ अध्यक्ष चामलिङ राङराङ-याङयाङ निर्वाचन क्षेत्र पुगेका थिए। भ्रमणको समापनपछि उनी आफ्नो पैतृक थलो पुगेर इष्टमित्र र स्थानीय गाउँलेसँग भेटघाट गरे। सो अवसरमा गाउँलेहरूले वर्तमान व्यवस्थामा भोग्नुपरेको चरम आर्थिक सङ्कट, पीडा र दैनिक जीवनका कठिनाइहरू चामलिङसमक्ष पोखेका थिए। पार्टीद्वारा जारी प्रेस विज्ञप्तिमा यसको विस्तृत जानकारी दिइएको छ।
​’डर र प्रलोभन त्यागेर आवाज बुलन्द गरौँ’
​गाउँलेसँगको अन्तरक्रियामा अध्यक्ष चामलिङले सिक्किमेली जनतालाई अब डर, प्रलोभन र व्यक्तिगत स्वार्थभन्दा माथि उठेर ‘गरीबको सरकार’ पुनर्बहाली गर्न आह्वान गरे।

मैले आफ्नो सम्पूर्ण जीवन सिक्किम र सिक्किमेली जनताकै सेवामा समर्पित गरेको छु र श्वास रहुञ्जेल म जनताको पक्षमा अटल र अविचलित रहनेछु,” चामलिङले थपे, “परिवर्तनको नारा दिएर आएको यो एसकेएम सरकार गरीबमारा हो। यसलाई सत्ताबाट नफालेसम्म सिक्किममा अनिष्ट मात्र भइरहनेछ। त्यसैले अब अन्यायको विरुद्धमा आवाज बुलन्द गर्ने बेला आएको छ।”