मुम्बई: भारतीय क्रिकेट टीमलाई अफगानिस्तानविरुद्ध आउँदो वनडे सीरीज अघि ठूलो झट्का लागेको छ। टीमको सबैभन्दा अनुभवी ब्याटरहरूमा एक विराट कोहली ह्याम्स्ट्रिंगको चोटले गर्दा पूरा सीरीजबाट बाहिर भएका छन्। भारत र अफगानिस्तानबीच ३ वटा वनडे म्याचको सीरीज १३ जूनदेखि धर्मशालामा शुरु हुनेछ। ३७ वर्षीय कोहलीलाई विश्वका सबैभन्दा फिट क्रिकेटरहरूमा एक मानिन्छ अनि हालै सम्पन्न आईपीएल २०२६-मा उनले असाधारण प्रदर्शन गरेका थिए। उनले यस साल आईपीएलमा ६७५ रन बनाएर आफ्नो टीम रोयल च्यालेञ्जर्स बेंगलुरुलाई लगातार दोस्रोपल्ट च्याम्पियन बनाउनमा महत्त्वपूर्ण भूमिका निर्वाह गरेका थिए। उनले फाइनलमा गुजरात टाइटन्सविरुद्ध म्याच जिताउने अर्द्धशतक बनाएका थिए अनि टीमको निम्ति विजयी छक्का पनि उनले नै लगाएका थिए। फाइनलमा ब्याटिंग गर्दा म्याचको अन्ततिर उनलाई लड़खड़ाइरहेको देखिएको थियो। टेस्ट र टी२० इण्टरनेशनलबाट सन्न्यास लिइसकेको हुनाले कोहलीले अहिले राष्ट्रिय टीमको निम्ति केवल वनडे म्याचहरू खेल्ने गर्छन्। कोहलीको साथमा रोहित शर्मा र अलराउण्डर हार्दिक पाण्ड्याको फिटनेसलाई लिएर पनि स्थिति सम्पूर्ण रूपले स्पष्ट छैन। रोहितले आईपीएलको अवधि ह्याम्स्ट्रिंगसँग सम्बन्धित समस्याको सामना गर्नु परेको थियो जबकि हार्दिक पाण्ड्यालाई ढाड़को चोटले सताएको छ। अफगानिस्तानविरुद्ध सीरीजको निम्ति रोहित र हार्दिकलाई टीममा सामेल गरिए पनि यी दुईजनाको उपलब्धता फिटनेसमाथि निर्भर गर्नेछ। कोहली पूरा सीरीजबाट बाहिर भइसकेको हुनाले अब भारतीय ब्याटिंग क्रममाथि दबाउ बढ़्नेछ।