दोस्रो समन्वय बैठक सम्पन्न

गान्ताेक: आगामी सिक्किम अन्तरराष्ट्रिय फिल्म महोत्सव (एसआईएफएफ) २०२६ को तयारीको क्रममा आज सूचना तथा जनसम्पर्क विभाग (आईपीआर) ले गान्तोकको सूचना भवनको सम्मेलन हलमा दोस्रो समन्वय बैठक आयोजना गर्‍यो। महोत्सव १९–२२ मार्चसम्म राजधानी गान्तोकमा आयोजना हुने तय भएको छ।
बैठकमा आईपीआरका अध्यक्ष आशित राई, सिक्किम फिल्म प्रोमोशन बोर्डका अध्यक्ष टाशी छिरिङ भोटिया, मुख्यमन्त्रीका प्रेस सचिव युगेन तामाङ, आईपीआरकी सचिव अन्नपूर्ण आले, निर्देशक सुनिल मोथे, प्रख्यात फिल्म निर्माता प्रशान्त रसाइली, साम्तेन भोटिया, त्रिवेणी राई र राज्यका फिल्म जगतका अन्य प्रतिनिधिहरू उपस्थित थिए।
आईपीआरका अध्यक्ष राईले महोत्सवको महत्व र कार्यक्रमलाई सफल बनाउन सबै सरोकारवालाहरूबाट सामूहिक प्रयासको आव्हान गरे। उनले निर्णायक मण्डल र विभिन्न समितिहरू गठन गरेर चलचित्र जगतबीच एकता र सक्रिय सहकार्य आवश्यक रहेकोमा जोड दिए।
सिक्किम फिल्म प्रोमोशन बोर्डका अध्यक्ष भोटियाले चलचित्र उद्योगको दीर्घकालीन विकास राज्य सरकारको प्राथमिकता रहेको बताए। उनले महोत्सवका पहलहरूले केवल कार्यक्रममा मात्र नभई उद्योगलाई दीर्घकालीन फाइदा पुर्‍याउनुपर्ने कुरामा जोड दिए।
मुख्यमन्त्रीका प्रेस सचिव तामाङले राज्य सरकारको पूर्ण समर्थन व्यक्त गर्दै महोत्सव सफल नभएसम्म समन्वय बैठकहरूको श्रृंखला जारी रहने जानकारी दिए। उनले सिक्किमलाई “हिमालयको चलचित्र राजधानी” का रूपमा स्थापित गर्ने दृष्टिकोण प्रस्तुत गरे।
फिल्म निर्माता भोटियाले महोत्सवको अभिन्न अंग ‘वेभ्स बजार’को महत्वबारे बोल्दै, यसले नयाँ र अनुभवी फिल्म निर्माताहरूलाई अवसर प्रदान गर्ने बताए। फिल्म निर्माता राईले स्थानीय निर्माताहरूलाई सहयोगीहरूमा परियोजना प्रभावकारी रूपमा प्रस्तुत गर्न कार्यशालाहरूको आवश्यकता औंल्याइन्। रसाइलीले फिल्म नीतिको महत्त्व र उद्योगलाई उपलब्ध फाइदाबारे जागरूकता बढाउने आवश्यकता उल्लेख गरे।

बैठकमा डा. मनोज राईलाई फिल्म मार्केट प्रमुख संयोजकको रूपमा चयन गरियो। साथै, छोटो फिल्म प्रतियोगिता (सिक्किम श्रेणी), पूर्वावलोकन समिति (सिक्किम अध्याय), क्युरेट गरिएका फिल्महरूको पूर्वावलोकन समिति र पिचिङ पूर्वावलोकन समितिका निर्णायक मण्डल सदस्यहरूको अन्तिम रूप दिइयो।
यसरी एसआईएफएफ २०२६ को तयारी तीव्र गतिमा अघि बढेको छ र राज्यका फिल्म जगतले महोत्सव सफल बनाउन सक्रिय सहभागिता जनाउने प्रतिबद्धता जनाएको छ।