गान्ताेक: प्रतिस्पर्धात्मक खेलमा सिक्किम पुलिसलाई ३-१ गोलअन्तरले पराजित गर्दै शिलोङ लाजोङ ४२ औँ गभर्नर्स गोल्डकप फुटबल प्रतियोगिताको सेमिफाइनलमा प्रवेश गरेको छ।​पहिलो हाफको मध्यतिर केन्स्टार खारसोङले पेनाल्टीमार्फत गोल गर्दै शिलोङ लाजोङलाई सुरुआती अग्रता दिलाएका थिए। तर, सिक्किम पुलिसका राहुल पास्वानले उत्कृष्ट र शक्तिशाली प्रहारमार्फत गोल गर्दै खेललाई १-१ को बराबरीमा ल्याए। पहिलो हाफ बराबरीमा सकिए पनि दोस्रो हाफको सुरुआतमै मैदान प्रवेश गरेका वैकल्पिक खेलाडी एभरब्राइट सानाले गोल गर्दै शिलोङलाई पुनः २-१ को अग्रता दिलाए।​पुनः बराबरी गोलको खोजीमा सिक्किम पुलिसले आक्रामक खेल पस्किए पनि शिलोङको बलियो रक्षापङ्क्ति तोड्न सकेन। खेलको अतिरिक्त समयमा सानाले व्यक्तिगत दोस्रो गोल गर्दै शिलोङ लाजोङको ३-१ को जित पक्का गरे। उत्कृष्ट प्रदर्शन गरेका साना खेलको ‘म्यान अफ द म्याच’ घोषित भए।​अब सेमिफाइनलमा शिलोङ लाजोङले अक्टोबर १४ मा स्थानीय टोली सिङलिङ फुटबल क्लबको सामना गर्नेछ।