नयाँ दिल्ली: ​अमेरिकी राष्ट्रपति डोनाल्ड ट्रंपले होर्मुज स्ट्रेटमा फसेका व्यापारिक जहाजहरूलाई सुरक्षित बाटो दिन सुरु गरिएको ‘प्रोजेक्ट फ्रीडम’ अभियान तत्कालका लागि रोक्ने घोषणा गर्नुभएको छ। ह्वाइट हाउसमा आयोजित पत्रकार सम्मेलनमा बोल्दै राष्ट्रपति ट्रंपले ईरानसँगको सम्झौताका दिशामा महत्वपूर्ण प्रगति भइरहेकाले आपसी सहमतिमा यो सैन्य अभियानलाई केही समयका लागि थाँती राखिएको जानकारी दिनुभयो। विशेष गरी पाकिस्तानको अनुरोध र उसले अमेरिका तथा ईरानबीच निर्वाह गरेको मध्यस्थकर्ताको भूमिकाका कारण यो निर्णय लिइएको ट्रंपले उल्लेख गर्नुभएको छ।
​अमेरिकी विदेश मन्त्री मार्को रुबियोले पनि ईरानविरुद्ध सञ्चालित अमेरिका–इजरायल संयुक्त अभियान ‘अपरेसन एपिक फ्युरी’ ले आफ्नो प्रारम्भिक लक्ष्य हासिल गरिसकेको बताउनुभएको छ। प्रशासनले ‘प्रोजेक्ट फ्रीडम’ लाई ईरानमाथिको आर्थिक नाकाबन्दीभन्दा फरक मानवीय र व्यापारिक सहजताको अभियानका रूपमा व्याख्या गरे पनि यसको स्थगनलाई इरानी सञ्चारमाध्यमहरूले भने आफ्नो रणनीतिक जितका रूपमा प्रचार गरेका छन्। ईरानले अमेरिकी अभियान जहाजहरू निकाल्न असफल भएपछि पछि हट्न बाध्य भएको दाबी गरेको छ।
​क्षेत्रीय तनाव अझै पूर्ण रूपमा मत्थर भइसकेको छैन। संयुक्त अरब इमिरेट्सले ईरानबाट आएका मिसाइल र ड्रोनहरू आफ्नो वायु रक्षा प्रणालीले विफल पारेको दाबी गरिरहँदा ईरानले भने ती आरोपहरूलाई निराधार बताएको छ। यसैबीच, बेलायती सामुद्रिक एजेन्सीले होर्मुज क्षेत्रमा एउटा मालवाहक जहाजमाथि अज्ञात वस्तुले आक्रमण गरेको सूचना सार्वजनिक गरेको छ, जसले गर्दा युद्धविरामको अवस्था अझै नाजुक देखिन्छ। अमेरिकी रक्षा मन्त्री पिट हेगसेथले युद्धविराम अझै कायमै रहेको र आफूहरूले परिस्थितिलाई नजिकबाट नियालिरहेको बताउनुभएको छ।
​राष्ट्रपति ट्रंपले आगामी दिनमा यो संकट समाधानका लागि जापान र चीनसँग पनि उच्चस्तरीय छलफल गर्ने योजना बनाउनुभएको छ। विशेष गरी अर्को साता हुने चीन भ्रमणका क्रममा चिनियाँ राष्ट्रपति शी जिनपिङसँग यस विषयमा निर्णायक कुराकानी हुने अपेक्षा गरिएको छ। विश्लेषकहरूका अनुसार अमेरिका तत्कालै ठूलो सैन्य मुठभेडमा जान अनिच्छुक देखिएको छ, किनकि युद्धको विस्तारले विश्व बजारमा तेलको मूल्य अनियन्त्रित भई विश्व अर्थतन्त्रमै गम्भीर असर पर्न सक्ने जोखिम छ।