नयाँ दिल्ली(नेत्र बिक्रम बिमली): फिफा विश्वकप २०२६ अन्तर्गत समूह चरणको आफ्नो दोस्रो खेलमा स्पेनले उत्कृष्ट पुनरागमन गर्दै साउदी अरबलाई फराकिलो अन्तरले स्तब्ध पारेको छ। प्रतियोगिताको आफ्नो पहिलो खेलमा केप भर्डेसँग गोलरहित बराबरीमा रोकिँदै अङ्क बाँड्न बाध्य भएको स्पेनले यस खेलमा भने आफ्नो वास्तविक लय समात्यो। सुरुवाती खेलमा देखिएको गोलको खडेरीलाई तोड्दै स्पेनका फरवार्डहरूले साउदी अरबको पोस्टमा लगातार आक्रमण बुने र महत्त्वपूर्ण तीन अङ्क सुरक्षित गर्दै समूह तालिकाको शीर्ष स्थानमा आफ्नो स्थान पक्का गरे।
​खेलको सुरुवातदेखि नै स्पेनिस टोली निकै आक्रामक रूपमा मैदानमा प्रस्तुत भएको थियो। साउदी अरबको रक्षापंक्तिलाई लगातार दबाबमा राख्ने क्रममा खेलको १०औँ मिनेटमै युवा स्टार लेमिन यामलले उत्कृष्ट गोल गर्दै स्पेनलाई सुरुवाती अग्रता दिलाए। स्पेनको यो आक्रमण यतिमा मात्र सीमित रहेन। खेलको २१ औँ मिनेटमा मिकाइल ओर्याजबलले टोलीका लागि दोस्रो गोल गरे र त्यसको लगत्तै २३ औँ मिनेटमा व्यक्तिगत दोस्रो तथा टोलीका लागि तेस्रो गोल थप्दै साउदी अरबलाई पूर्ण रूपमा दबाबमा राखे। पहिलो हाफमै व्यहोरेको तीन गोलको झट्काबाट साउदी टोली सम्हालिन निकै गाह्रो परेको देखिन्थ्यो।
​दोस्रो हाफ सुरु भएलगत्तै खेलमा साउदी अरबका लागि अर्को दुर्भाग्यपूर्ण क्षण आयो। खेलको ४८औँ मिनेटमा स्पेनको तर्फबाट भएको एक शक्तिशाली प्रहारलाई साउदीका गोलकिपर मोहम्मद एलोयिसले बचाउने प्रयास गरेका थिए। तर, उनले हातले ठेलेको बललाई पोस्ट नजिकैबाट क्लियर गर्न खोज्दा साउदीकै डिफेन्डर हसन अल तम्कदीको खुट्टामा ठोक्किएर बल आत्मघाती गोल हुन पुग्यो। खेलको ९०औँ मिनेटमा स्पेनका फरान टोरेसले बललाई जाली चुमाउँदै पाँचौँ गोलको खुसीयाली मनाएका थिए, तर भिडियो असिस्टेन्ट रेफ्री (वीएआर) को जाँचपछि उक्त गोललाई अफसाइड ठहर गरियो र त्यसले मान्यता पाएन।
​यो जित स्पेनका लागि पहिलो खेलको निराशा मेटाउने माध्यम बनेको छ, जहाँ केप भर्डेका ४० वर्षीय अनुभवी गोलकिपर भोजिन्हाले स्पेनका हरेक प्रहारलाई असफल पारिदिएका थिए। अर्कोतर्फ, आफ्नो पहिलो खेलमा बलियो उरुग्वेलाई १-१ को बराबरीमा रोकेर उत्साहजनक सुरुवात गरेको साउदी अरबका लागि यो पराजय एउटा ठूलो धक्का साबित भएको छ। यस सानदार जितपछि स्पेन तालिकाको शीर्ष स्थानमा उक्लिएको छ भने समूह चरणबाट नकआउटमा पुग्ने समीकरणलाई यसले अझ रोचक बनाएको छ।