​सोरेङ: सोरेङ जिल्लामा स्वास्थ्य सेवालाई अझ सुदृढ र जनमुखी बनाउने उद्देश्यका साथ सामुदायिक स्वास्थ्य केन्द्र (सीएचसी) सोरेङलाई एउटा नयाँ एम्बुलेन्स हस्तान्तरण गरिएको छ। राज्यसभा सांसद डीटी लेप्चाको विशेष सहजीकरणमा सीएसआर पहल अन्तर्गत प्राप्त भएको उक्त एम्बुलेन्स सिक्किम विधानसभाकी उपाध्यक्ष राजकुमारी थापाको बाहुलीबाट आज स्वास्थ्य केन्द्रलाई हस्तान्तरण गरिएको हो। सोरेङको डाक बङ्गलामा चलिरहेको २१२ औं राष्ट्रिय स्तरीय भानु जयन्ती समारोहको अवसर पारेर सोरेङकी मुख्य चिकित्सा अधिकारी (सीएमओ) डा. स्मृति राईलाई सो गाडीको साँचो सुम्पिएको थियो।
​यस अवसरमा सोरेङ-च्याखुङ क्षेत्रका विधायक आदित्य गोलेले सोरेङ जिल्लाका समग्र जनताको तर्फबाट सांसद लेप्चाप्रति हार्दिक कृतज्ञता व्यक्त गर्नुभयो। जिल्लाको आकस्मिक स्वास्थ्य उपचार र बिरामी ओसारपसारमा यस एम्बुलेन्सले ठुलो राहत पुर्‍याउने विश्वास लिइएको छ।

उक्त महत्त्वपूर्ण कार्यक्रममा विधायक कला राई, विधायक पामिन लेप्चा, विधायक सुदेश कुमार सुब्बा, सोरेङका जिल्लापाल, प्रहरी उपरीक्षक (पुलिस अधीक्षक) लगायत अन्य स्थानीय गणमान्य व्यक्तिहरूको बाक्लो उपस्थिति रहेको थियो।