​नयाँ दिल्ली: भारतका केन्द्रीय गृहमन्त्री अमित शाहले रणनीतिक रूपमा अत्यन्तै संवेदनशील मानिने सिलीगुडी कोरिडोर (चिकन नेक) को सुरक्षाका लागि एक विशेष ‘त्रिकोणीय सुरक्षा ग्रिड’ (त्रिभुजाकार सुरक्षा घेरा) निर्माण गर्ने घोषणा गरेका छन्। उत्तर बङ्गालस्थित सशस्त्र सीमा बल (एसएसबी) को हेडक्वार्टरमा आयोजित कार्यक्रमलाई सम्बोधन गर्दै गृहमन्त्री शाहले यस क्षेत्रको सुरक्षा व्यवस्थालाई अभेद्य बनाउन असमको धुबरी, बिहारको किशनगञ्ज र पश्चिम बङ्गालको चोपडालाई जोडेर तीन वटा नयाँ मिलिट्री ग्यारिसन (सैन्य छाउनी) स्थापना गरिने जानकारी दिए।
​सिलीगुडी कोरिडोरले भारतका आठ वटा उत्तर-पूर्वी राज्यहरूलाई बाँकी भारतसँग जोड्ने भएकाले यो राष्ट्रिय सुरक्षाका दृष्टिले अति संवेदनशील मानिन्छ। नयाँ बन्ने ग्रिडले यस क्षेत्रमा सैन्य उपस्थिति, निगरानी र प्रशासनिक नियन्त्रणलाई अझ सुदृढ बनाउनेछ। कार्यक्रमका क्रममा गृहमन्त्री शाहले करिब रु १८९ करोडको लागतमा निर्माण हुने विभिन्न प्रशासनिक तथा आवासीय परियोजनाहरूको शिलान्यास र उद्घाटन समेत गरे।
​सन् १९६५ मा स्थापना भएको एसएसबीले भारत-नेपाल र भारत-भुटान सीमाको सुरक्षाको जिम्मेवारी निभाउँदै आएको छ। यस संवेदनशील क्षेत्रको सुरक्षा तयारी र सैन्य क्षमतालाई चुस्त राखिरहन ‘तीस्ता प्रहार’ जस्ता सैन्य अभ्यासहरू निरन्तर सञ्चालन भइरहेको र यो नयाँ सुरक्षा ग्रिडले सीमावर्ती क्षेत्रमा अवैध गतिविधि नियन्त्रण गर्न महत्त्वपूर्ण भूमिका खेल्ने गृहमन्त्री शाहले बताए।