सांसद राजु बिस्टद्वारा श्रद्धाञ्जली अर्पण
​

सिलगढी: ​नेपाली साहित्यका नक्षत्र एवं आदिकवि भानुभक्त आचार्यको जन्मजयन्ती आज सिलगढीको दीनबन्धु मञ्चमा भव्यताका साथ मनाइएको छ। दार्जिलिङ संसदीय क्षेत्रका भारतीय लोकसभा सदस्य (सांसद) राजु बिस्टले कार्यक्रममा विशेष रूपमा सहभागी भई आदिकवि भानुभक्त आचार्यको तस्विरमा पुष्पगुच्छा अर्पण गर्दै भावपूर्ण श्रद्धाञ्जली व्यक्त गर्नुभयो। उक्त गरिमामय समारोहमा क्षेत्रका प्रतिष्ठित व्यक्तित्वहरू, समाजका विभिन्न वर्गका प्रबुद्ध प्रतिनिधिहरू तथा सांस्कृतिक क्षेत्रका कलाकार एवं विशिष्ट अग्रजहरूको उल्लेखनीय उपस्थिति रहेको थियो।

​कार्यक्रमको समापनपछि सञ्चारमाध्यमहरूसँग कुराकानी गर्दै सांसद राजु बिस्टले आदिकवि भानुभक्त आचार्य नेपाली भाषा र साहित्यको इतिहासमा एक कहिल्यै बिर्सन नसकिने अमर व्यक्तित्व भएको बताउनुभयो। यस ऐतिहासिक कार्यक्रममा सहभागी हुन पाउनु आफ्ना लागि निकै गौरव र सम्मानको विषय भएको उल्लेख गर्दै उहाँले भानुभक्तको साहित्यिक योगदान र उच्च आदर्शले आउने अनेकौँ पुस्तालाई सधैँ सही मार्गमा अघि बढ्न प्रेरित गरिरहने विश्वास व्यक्त गर्नुभयो।

सांसद बिस्टले अगाडि भन्नुभयो, “आदिकवि भानुभक्त आचार्यको योगदान केवल नेपाली भाषा र साहित्यको विकासमा मात्र सीमित छैन; उहाँको सिर्जनाले भारत, नेपाल र विश्वभर छरिएर रहेका सम्पूर्ण नेपाली भाषी समुदायको सांस्कृतिक सम्पदा र पहिचानलाई अझ बढी समृद्ध र शक्तिशाली बनाएको छ।