सिलगढी: गुप्त स्रोतबाट प्राप्त विशेष सूचनाका आधारमा सिलगढी पुलिस मेट्रोपोलिटनअन्तर्गत न्यू जलपाइगुडी थाना र स्पेसल अपरेसन्स ग्रुप (एसओजी) को संयुक्त टोलीले छापा मारेर ब्राउन सुगरसहित दुई जनालाई पक्राउ गरेको छ।
पुलिसका अनुसार २८ सेप्टेम्बर २०२६ मा न्यू जलपाइगुडी थाना क्षेत्रअन्तर्गत एएच–०२ को पोड़ाझार मोड़मा संयुक्त टोलीले कारबाही गरेको थियो। सो क्रममा माल्दा जिल्लाको कालियाचक निवासी २३ वर्षीय मोहम्मद रशिदुल हक र २१ वर्षीय सनाउल हकलाई नियन्त्रणमा लिइएको हो।
तलासीका क्रममा उनीहरूको साथबाट ६६४ ग्राम संदिग्ध ब्राउन सुगर, दुई थान मोबाइल फोन तथा नगद ९ हजार रुपैयाँ बरामद गरी प्रहरीले जफत गरेको जनाएको छ।
घटनासम्बन्धी मादक पदार्थ तथा साइकोट्रोपिक पदार्थसम्बन्धी ऐन (एनडीपीएस ऐन) का प्रचलित प्रावधानअन्तर्गत न्यू जलपाइगुडी थानामा मुद्दा दर्ता गरिएको छ। प्रहरीले खोजतलासी, बरामदगी तथा पक्राउसम्बन्धी सम्पूर्ण प्रक्रिया एनडीपीएस ऐनका प्रावधान तथा निर्देशिकाअनुसार पूरा गरिएको जनाएको छ।
पुलिसका अनुसार घटनाबारे थप अनुसन्धान जारी रहेको छ। पक्राउ परेका दुवै जनामाथि बरामद पदार्थको स्रोत तथा यसको सम्भावित ओसारपसारसम्बन्धी विषयमा समेत अनुसन्धान भइरहेको छ।